Teberga tien una superficie de 173,81 km² mui montañosa, con tres grandes valles:
Valdesampedro, Valdesantibanes y Valdecarzana. La Ferreirúa, con 1.983 metros, ye'l altor más destacáu. Llenda'l conceyu al Norte con Miranda, Grau, Yernes y Tameza y Proaza, al Este con Quirós y Proaza, al Sur con Lleón y al Oeste con Somiedu.
Hai censaos 1.932 teberganos (1.012 homes y 920 muyeres), polo que la densidá de población ye d'unos 11,47 hab/km². La villa de Samartín, na parroquia de La Plaza, ye'l noyu más pobláu'l conceyu, colos sos 527 habitantes, mientres que'l llugar de La Plaza, asitiada a la vera Samartín, ye la capital, pesie a contar con solo 53 habitantes.
Les primeres notes documentales referentes al territoriu daten de la dómina de la monarquía asturiana, con donaciones al monasteriu de San Pedro de Teberga y, sobre too, al obispáu d'Uviéu, que se sedrá'l poder dominante ellí hasta'l momentu de la desamortización de Felipe II, en 1579, cuando espropiará a la Ilesia estos y otros territorios pa subastalos: el meyor postor pa Teberga diba ser la familia de Miranda que caltendríen esti señoríu, constituyíu en conceyu nesi intre, hasta'l sieglu XIX. En 1827, incorporaráse'l cotu de La Foceicha que, por un privilexu de 1033 del rei Bermudo III, goció de completa independencia.
El Decretu 47/2010 del 18 de mayu, asoleyáu nel BOPA númberu 121 del xueves 27 de mayu, oficializa l'usu de los topónimos tradicionales del conceyu, espublizaos nel ANEXU al decretu.
Teberga tien trece parroquies:
| NOMES | SUPERFICIE | POBLACIÓN |
| Barriu | 15,72 | 30 |
| Carrea | 7,00 | 54 |
| La Foceicha | 23,84 | 13 |
| Parmu | 14,81 | 114 |
| La Plaza | 9,13 | 828 |
| Rieḷḷu | 5,89 | 117 |
| San Salvador d'Alesga | 5,08 | 90 |
| Santianes | 22,83 | 293 |
| Taxa | 14,65 | 63 |
| Torce | 7,51 | 15 |
| Urria | 6,14 | 33 |
| Viḷḷamayor | 9,84 | 75 |
| Viḷḷanueva | 31,37 | 207 |
No hay comentarios:
Publicar un comentario