Tien el puntu de mayor altor nel picu Barzanalgas (Sierra de Sobia), de 1.485 metros. Los sos 76,79 km² de superficie llenden al Norte con Santu Adrianu y Grau, al Este con Quirós, al Sur con con Quirós y Teberga y al Oeste con Teberga, Yernes y Tameza y Grau. Viven nel conceyu 814 persones (450 homes y 364 muyeres), polo que la densidá de población ye d'unos 10,3 hab/km². La villa capital de Proaza, de 339 habitantes, ye'l noyu más pobláu del conceyu.
Del 863 son les primeres cites documentales al territoriu del conceyu, nomándolu yá por un nome identificable: trátase de les donaciones monárquiques de los cotos de " Uandugio, Pruazia y Charanga". Ye a destacar na hestoria del conceyu, el llevantamientu del noble Gonzalu Pelaez escontra Alfonso VII, asocedíu nel castiellu Proaza ente 1133 y 1135. A nivel alministrativu, el territoriu tuvo en manes del obispáu d'Uviéu mientres la Edá Media y hasta la desamortización de Felipe II de 1579, mercáu polos paisanos dos años más tarde y constituyíu en conceyu el 16 de xunetu d'esi mesmu añu de 1581. Los cotos de Llinares y Llendelafaya, incorporáronse al conceyu en 1827, tres dixebrase de Santu Adrianu. El territoriu proacín quedaría dafechu como anguaño'l 16 de xunu de 1859, cola entrada nel conceyu de los cotos de Santu Adrianu de Proacina y Caranga.
La toponimia tradicional asturiana ye la oficial en Proaza dende la aprobación del Decretu 49/2008 del 19 de xunu, asoleyáu nel BOPA númberu 153 del miércoles 2 de xunetu. Les formes aprobaes pola Xunta Asesora de la Toponimia espublizáronse al empar nel ANEXU 1, anque tuvieron correiciones, recoyíes nel BOPA númeberu 163 del llunes 14 de xunetu d'esi mesmu añu.
Proaza tien ocho parroquies:
| NOMES | SUPERFICIE | POBLACIÓN |
| Banduxu | 10,78 | 40 |
| Caranga | 14,32 | 93 |
| Llinares | 4,34 | 36 |
| Proacina | 5,14 | 24 |
| Proaza | 4,84 | 339 |
| Samartín | 14,10 | 139 |
| Sograndiu | 9,98 | 78 |
| Trespena | 13,29 | 65 |
Mapa parroquial del conceyu de Proaza, dixebráu por colores.
No hay comentarios:
Publicar un comentario