23 mar 2012

Pitición de revisión de la toponimia cabraliega.

Como fai unes feches ficiera'l Valle Altu, el conceyu llindante de Cabrales tamién pidió la revisión de la so toponimia pa oficializar la tradicional. Alcuéntrase la nueva nel peridiódicu (agora dixital) "Les Noticies".

8 mar 2012

Aniciu d'espediente pal Valle Altu

Informa'l periódicu "El Comercio" de la solicitú del Ayuntamientu de Peñamellera Alta al direutor xeneral de Política Llingüística p'aniciar el procesu d'oficialización de los topónimos tradicionales del conceyu.

11 ene 2012

Yernes y Tameza


Esti conceyu asiéntase na zona central del territoriu asturianu y tien una superficie de 31,63 km² mui pindia y d'altures granibles, tando'l so mayor altor nel picu Cuesta, de 1.373 metros. Llenda col conceyu Grau al Norte, Noreste y Oeste, con Proaza al Sureste y con Teberga al Sur.

Yernes y Tameza ye'l conceyu menos pobláu d'Asturies, con solo 170 vecinos (89 homes y 81 muyeres). La so densidá de población ye de 6 hab/km². Y el principal noyu de población ye'l llugar de Yernes, onde la parroquia homónima, con 71 habitantes, mientres que la capital, el llugar de Villabre, tien 49.

El rei asturianu Ordoñu I donó en 857 parte del territoriu actual a la ilesia de San Salvador, qu'algamaría'l restu cuando'l rei Fernando II-y cediera los sos drechos en 1157. La desamortización de Felipe II de 1579 dio la posibilidá a los vecinos de redimise de los privilexos mitrales, formando un consistoriu formáu por dos alcaldes (ún pal Estáu noble y otru pal llanu), un personeru de los nobles, un rexidor y un xuez y estableciendo la capitalidá en Villabre dende 1584.

El Decretu 21/2009 de 25 de marzu, asoleyáu nel BOPA númberu 84 del llunes 13 d'abril, fizo que s'oficializara la toponimia tradicional del conceyu, recoyía nel ANEXU al decretu y aporbada pola Xunta Asesora de la Toponimia.

Yernes y Tameza tien dos parroquies:



Grau


Grau asítiase na fastera central asturiana. La so superficie ye de 216,68 km² y dixébrase en dos zones orográfiques bien diferenciaes: la parte Norte, de valles y montes de pequeña altitú; y la Sur, coles primeres estribaciones de la Cordillera Cantábrica, onde algama altores d'hasta 1.437, onde'l picu La Berza. Llenda al Norte con Candamu y Les Regueres, al Este con Uviéu, Santu Adrianu y Proaza, al Sur con Teberga y Yernes y Tameza y al Oeste con Miranda y Salas.

Tien una población de 11.003 habitantes (5.339 homes y 5.664 muyeres) y una densidá de 50 hab/km². El principal nucleu de población ye la villa de Grau, la capital, de 7.494 habitantes.

Durante l'Alta Edá Media, el territoriu del Grau d'anguaño taba dixebrá en tres cotos, el de Pramaru, el de Salcéu y el de Vayu, tamién nomáu Grau, términu que tomará la pola concedía pol rei Alfonso X cola carta pueblu de 1277. El conceyu pasará a manes de la familia Quiñones dende'l sieglu XV al XVIII, momentu cuando los vecinos pidieron al rei Carlos III la posibilidá de redimise y poder escoyer los propios conceyales de forma direuta, ensin intervención nobiliaria, fallando l'Audiencia d'Uviéu en 1774 y la Cancillería Real en 1783 contra'l monopoliu señorial, anque esti caltendrá dellos cotos dientro'l territoriu hasta'l trieniu lliberal. La forma territorial actual llegará cola dixebra del conceyu de Candamu en 1835.

La toponimia oficial de Grau ye la tradicional dende l'aprobación del Decretu 7/2007 del 31 de xineru, espublizáu nel BOPA númberu 48 del martes 27 de febreru, onde quedaben recoyíes tamién les formes aprobaes pola Xunta Asesora de la Toponimia dientro'l ANEXU al mesmu.

Grau tien ventiochu parroquies:



Miranda


Esti conceyu asítiase na fastera centru-occidental del territoriu asturianu. La so superficie, de 208,01 km², ta dixebrada de Norte a Sur pol ríu Pigüeña y ye mui accidentada, tando'l so mayor altor nel Picu L'Horru, de 1.527 metros. Llenada al Norte con Salas, al Este con Grau, al Sur con Teberga y Somiedu y al Este con Tinéu.

Viven en Miranda 1.751 persones (894 homes y 857 muyeres) y tien una densidá de población de 8,24 hab/km². El principal noyu de población ye la villa de Balmonte, la capital, con 416 habitantes.

Durante la dómina de la monarquía asturiana, l'actual territoriu del conceyu taba dixebrá en dos circunscripciones: la de Miranda y la de Salcéu, nes márxenes izquierda y drecha del ríu Pigüeña, respeutivamente. Nel 1032 fúndase'l monasteriu de Santa María nel nucleu Lapideum, que nel sieglu XII renomarase como Balmonte; esti monasteriu va ser el noyu vertebrador del territoriu hasta'l sieglu XIV. En 1277, el rei Alfonsu X concederá la carta puebla a los vecinos, creyándose nel llugar d'Augüera la Pola de Miranda y Somiedu, que se treslladará al segundu términu por discrepancies col monateriu. Pero pa la Edá Moderna, surden dos cases nobiliaries con fuercia, los Quiñones y los Miranda, qu'algamarán l'antiguu poder monásticu y creyarán un conceyu que, ente otres coses, formará parte del Partíu los Cinco Conceyos con Grau, Valdés, Salas y Pravia dientro la Xunta'l Principáu. Pal sieglu XVIII, el territoriu actual taba dixebráu ente'l cotu monásticu (parroquia de Balmonte), el conceyu Grau (al que pertenecía l'antiguu cotu de Salcéu) y el conceyu de Miranda, dixebrá en Miranda l'Alta y Miranda la Baxa pol cotu monásticu. Nun va ser hasta'l sieglu XIX, coles reformes lliberales, qu'acaben col poder señorial, y la desamortización de Mendizábal, qu'espropia los bienes de la Ilesia, cuando se creye'l conceyu paecíu al d'anguaño, pasando la capital de los llugares de Lleiguarda y Silviella al actual, na villa de Balmonte. El territoriu zarraráse en 1886 cuando los vecinos de les parroquies d'Ondes, L.lamosu y Montoubu (antiguu territoriu de Salcéu) piden pasar de Grau a Miranda.

En 1958, el nome del conceyu camudará del de raigón medieval, Miranda, al de la capital del conceyu n'español, Belmonte. Anguaño, pol Decretu 112/2008 del 28 d'ochobre, asoleyáu nel BOPA númberu 261 del llunes 10 de payares, el conceyu recuperó los toponimos tradicionales, recoyíos nel ANEXU al decretu.

Miranda tien quince parroquies:



10 ene 2012

Salas


Salas alcuéntrase na fastera centru-occidental del país y el so territoriu, d'una superficie de 227,11 km², ye de media montaña, tando'l so mayor altor L'Aguión, de 927 metros, y bañáu poles cuenques del ríu Narcea, onde destaca'l so afluyente, el ríu Nonaya. Llenda al Norte con Valdés, Cuideiru y Pravia, al Este con Pravia tamién y con Candamu y Grau, al Sur con Miranda y al Este con Tinéu y Valdés otra vuelta.

Viven nesti conceyu 5.886 persones (2.936 homes y 2.950 muyeres), con una densidá de 26,25 hab/km². La capital, la villa de Salas, ye'l noyu más habitáu con 1.597.

Mientres la Edá Media coesisten tres poderes alministrativos pa lo que ye'l conceyu anguaño: el monasteriu de San Salvador de Curniana, fundáu en 1024 y que pasaría a ser cluniaciense en 1122; el Señoríu de Salas, al otorgar el rei Alfonso VII de Lleón a la familia Lamuño les entidaes de Salas y Lamuño y los cotos de San Salvador y Linares; y el conceyu Salas de Nonaya, concedía la carta puebla pol rei Alfonso X en 1277 (esi mesmu añu firma un documentu d'hermandá en La Espina con otros conceyos asturianos y a partir de 1490 va formar parte del Partíu los Cinco Conceyos xunto a Grau, Valdés, Miranda y Pravia dientro la Xunta Xeneral). Esti repartu, con dellos camudamientos y dixebres, va caltenese hasta'l sieglu XIX, momentu cuando asoceden dellos camudamientos territoriales: en 1804 delles parroquies de Grau s'incorporen a Salas (San Antolín de las Dorigas, San Xustu de las Dorigas, San Esteba de las Dorigas y Santolaya de las Dorigas); mientres'l Trieniu Lliberal (1820-1823), la parroquia de La Espina dixébrase pa formar conceyu propiu; en 1827 intégrense los cotos de Curniana, Soutu los Infantes y Ḷḷaviu; y en 1835, la desamortización de Mendizábal favorez que'l monasteriu de Curniana pase al conceyu. Pero va ser en 1929, pol Real Decretu del 5 d'agostu, cuando'l territoriu del conceyu quedará como anguaño al sumase a Pravia les parroquies de Folgueras y Cordoveiru.

Salas nun tien la toponimia tradicional oficializada porque la Xunta Asesora de Toponimia tovía nun escomenzó'l procesu d'estudiu de la mesma.

Esti conceyu tien ventiochu parroquies:



Candamu


Esti conceyu asítiase na fastera central del territoriu asturianu, nuna superficie de 71,91 km² de territoriu de monte baxu, con un altor másimu na cota de La Degollá, de 624 metros. Llenda al Norte con Illas, Castrillón y Sotu'l Barcu, al Este con Las Regueras, al Sur con Grau y al Oeste con Salas y Pravia.

Viven en Candamu 2.160 persones (1.062 homes y 1.098 muyeres), con una densidá de población de 31,87 hab/km². El nucleu mas habitáu ye'l llugar de San Román, na parroquia homónima, colos sos 268 habitantes, mientres que la capital, el llugar de Grullos, tien 172.

Les primeres referencies documentalen falen del territoriu de Candamu como la parte oriental del valle del Nalón qu'ocupa anguaño. Pa'l sieglu XII, esti territoriu ye d'alministración de los alfoces de Pravia y, dempués, de Gozón, anque nel sieglu XIII, pasa a xurisdicción del conceyu de Grau. En 1784 escomiencen les aiciones escontra'l conceyu de Grau, hasta que la Xunta de Candamu se proclame, nel añu 1835, corporación independiente.

Candamu sigue cola toponimia falsificada porque la Xunta Asesora de la Toponimia tovía nun inició los estudios de la tradicional del conceyu.

Candamu tien once parroquies:


Sotu'l Barcu


Sotu'l Barcu asítiase sobre la rasa llitoral de la oriella oriental de la desembocadura del ríu Nalón, na zona central asturiana. Tien una superficie de 35,34 km² y la so másima altitú alcuéntrase nel Picu Coronas, de 462 metros. Llenda al Norte col mar Cantábricu, al Este con Castrillón, al Sur con Candamu y Pravia y al Oeste, otra vuelta con Pravia y con Muros.

Viven nesti conceyu 4.056 persones (1.985 homes y 2.071 muyeres), lo que fai una densidá de 115,59 hab/km². El principal noyu de población ye'l llugar de L'Arena, na parroquia de Ranón, con 1.531; la capital, la villa de Sotu, tien 689 habitantes.

Como'l restu del valle baxu del Nalón, el territoriu de Sotu'l Barcu fue dependiente de Pravia, hasta que en 1617 pasó a manes de la familia de Miranda, marqueses de Valdecarzana. Cola llegada del sieglu XIX y les polítiques lliberales, Sotu'l Carcu incorpórase al conceyu de Pravia por un breve tiempu, hasta qu'algama la independencia dafechu el día 29 d'avientu de 1836.

Sotu'l Barcu ye un de los quince conceyos onde tovía nun s'iniciaron los estudios de la toponimia tradicional.

Tien cuatro parroquies:



9 ene 2012

Muros


Muros ye'l segundu conceyu más pequeñu en superficie d'Asturies, con solo 8,09 km², asitiáu na fastera centru-occidental d'Asturies, onde la marxen izquierda de la desembocadura del ríu Nalón, quedando'l so mayor altor nos 130 metros atopaos nel llugar de Muros. Llenda al Norte col mar Cantábricu, al Este col estuariu del Nalón por Sotu'l Barcu, al Sur con Pravia y al Oeste con Cuideiru.

La población de Muros ye de 1.959 persones (927 homes y 1.032 muyeres), polo que la densidá algama los 239,61 hab/km². El llugar de San Esteban, única entida de población de la parroquia homónima, ye'l noyu más pobláu colos sos 639 habitantes, mientres que la capital, la villa de Muros, queda con 417.

El territoriu de Muros va ser integráu nel alfoz de Pravia nel sieglu XIII, pasando dempués a les manes de la casa de Miranda, dempués marqueses de Valdecarzana, dominiu que llegara hasta'l 1827, momentu cuando pasará otra vuelta a ser cotu pravianu, p'algamar la independencia en 1836, xunto con Cuideiru y Sotu'l Barcu.

La Xunta Asesora de la Toponimia del Principáu d'Asturies tovía nun inició'l procesu d'estudiu y aprobación de les formes toponímiques tradicionales pal conceyu.

Muros tien dos parroquies:



Pravia


Pravia ye un conceyu asitiáu a la vera'l Nalón, na zona centro-occidental del territoriu asturianu. Tien una estensión de 102,96 km², de vegues y pequeñes montañes qu'algamen el so másimu altor nel Llan de Cubel, de 678 metros. Llenda al Norte con Cuideiru y Muros, al Este con Sotu'l Barcu y Candamu, al Sur con Candamu y Salas y al Este con Salas y Cuideiru.

Tien una población de 9.012 persones (4.382 homes y 4.630 muyeres) y una densidá de 87,40 hab/km². La villa de Pravia, capital del conceyu, ye'l nucleu mas pobláu, con 5.192 habitantes.

Los primeros documentos de Pravia, alcuéntrense yá na dómina romana, cuando l'emperador Vespasiano funda'l municipium de Flavium Avia a la vera'l Nalón (y que vien siendo identificada bien con Pravia bien con Santianes). El rei asturianu Silu tresllada la capital del reinu a Pravia nel 744, calteniéndose equí mientres los reinaos de Mauregatu y Bermudu y hasta que'l rei Alfonsu II lleva la corte pa Uviéu. Por embargu, siguirá siendo'l noyu alministrativu de la raxón del baxu Nalón, recibiendo la carta puebla de manes del rei Fernando III. Yá pal sieglu XV, va formar parte del Partíu de los Cinco Conceyos dientro la Xunta Xeneral, xunto a Miranda, Valdés, Grau y Salas. El so territoriu actual queda dibuxáu en 1836, cuando s'independicen los conceyos de Cuideiru, Muros y Sotu'l Barcu.

Pravia índa nun tien escomenzaos los estudios toponímicos necesarios p'aprobar les propueste de formes tradicionales del conceyu.

Esti conceyu tien quince parroquies:



Cuideiru


Cuideiru ye un conceyu del centru-occidente asturianu, que tien una superficie de 100,78 km², dixebrada en tres rexones orográfiques: una rasa llitoral d'escobios al Norte, una central de valles mui fértiles y una meridional de montañes que nun lleguen a los 800 metros, siendo'l mayor altor del conceyu El Cuetu, de 786 metros. Llenda la Norte col mar Cantábricu, al Este con Muros y Pravia, al Sur, otra vuelta con Pravia, Salas y Valdés, col que tamién llenda al Este.

La población del conceyu de Cuideiru ye de 5.753 habitantes (2.834 homes y 2.929 muyeres), lo que fai una densidá d'alrodiu 56,80 hab/km². El noyu más pobláu asítiase ye la villa de Cuideiru, la capital, con 1.615 habitantes.

La hestoria de Cuideiru ta mui vinculada a la de Pravia, conceyu al que perteneció hasta'l sieglu XIX. La primer noticia que tenemos de Cuideiru ye una donación al monasteriu Courias. La relación con Pravia nun siempre fue buena: nel sieglu XIV solicítase la concesión del alfolí de sal, mui importante pal puertu pesqueru, pero nun se-y da; nel XVIII, los vecinos deciden pagar 1.000 doblones pa dixebrase, pero esto nun s'algamará hasta'l sieglu XIX, en 1836.

La Xunta Asesora de la Toponimia tovía nun escomenzó colos trabayos d'estudiu de les formes tradicionales pa los topónimos del conceyu.

Cuideiru tien nueve parroquies:



Enlace

Valdés


Valdés ye un conceyu asturianu de la fastera occidental del país, el cuartu n'estensión colos sos 353,52 km² de rasa costera al Norte y de tarrén montañosu dixebráu por valles de direición Sur-Norte, con Pena Cezures, de 1.010, como altor más destacáu. Llenda al Norte col mar Cantábricu, al Este con Cuideiru y Salas, al Sur con Tinéu y Salas y al Oeste con Villayón y Cuaña.

Esti conceyu tien una población de 13.371 habitantes (6.517 homes y 8.854 muyeres) y una densidá de 37,82 hab/km². El noyu más habitáu ye la villa de Ḷḷuarca, capital del conceyu, con 4.264 habitantes.

Diferentes llugares del territoriu de Valdés apaecen na documentación baxomedieval, pero seldrá nel 1270, cuando apaezca comu tal na carta puebla que concede'l rei Alfonso X, pola que se creya la pola de Valdés y el conceyu, quedando como propiedá real toles tierres antañu monástiques. Hai que destacar la gran importancia va tener el Gremiu de Mareantes de Ḷḷuarca nesti conceyu. En el sieglu XVI, Valdes a apaez nes actes de la Xunta Xeneral del Princiáu como integrante del Partíu de los cinco conceyos (xunto a Grau, Salas, Pravia y Miranda. En 1909 prodúzse un casu singular: camudase'l nome'l conceyu pol de la capital n'español, esto ye, "Luarca"; fechu que se correxirá en 1985 pa volver a tomar el tradicional.

Valdés nun tien oficializada la toponimia tradicional porque la Xunta Asesora de Toponimia tovía ta trabayando na ellaboración del estudiu.

Valdés tien quince parroquies:



8 ene 2012

Navia


Navia ye un conceyu del occidente asturianu que s'asitia onde la desembocadura del ríu que-y da nome. La so superficie, de 63,11 km², ye de rasa costera al Norte, de valles nel centru y de montañes que malpenes lleguen a los 800 metros d'altor al Sur (siendo'l puntu más eleváu'l picu Panondres, de 843 metros.

La población de Navia llega a les 9.085 persones (4.443 homes y 4.642 muyeres), con una densidá de 142,95 hab/km². El noyu de mayor población ye la capital, la villa de Navia, con 4.084 habitantes.

Nel sieglu XII apaez l'alfoz de Navia, qu'incluyía amás los territorios de Villayón y La Montaña (Riunegru), que sedríen incorporaos al obispáu d'Uviéu pol rei Alfonso VII y nun volveríen al dominiu naviegu hasta la desamortización de Felipe II de 1579, cuando'l conceyu de Navia, creyáu al rodiu la carta puebla concedía pol rei Alfonso X en 1270. El territoriu del conceyu Navia quedará como ta anguaño nel sieglo XIX, cuando Villayón s'independiza y La Montaña s'incorpora al conceyu vecín de Valdés.

La Xunta Asesora de la Toponimia nun escomenzó'l llabor d'estudiu de los nomes de sitiu tradicionales del conceyu.

Navia tien ocho parroquies:



Cuaña


Cuaña ye un conceyu del occidente d'Asturies, con una superficie de 65,80 km² dixebrada en dos zones orográfiques: una rasa llitoral al Norte y un tarrén d'altor moderáu, que nunca nun supera los 800 metros y onde destaca'l picu Llebredo. Llenda'l Norte col mar Cantábricu, al Este con Navia y Villayón, al Sur con Bual y al Oeste con El Franco.

Tien una población de 3.464 habiantes (1.677 homes y 1.787 muyeres) y una densidá de 52,49 hab/km². El noyu más pobláu'l conceyu ye'l llugar d'Ortigueira, na parroquia de Mouguías, con 548 habitantes, mientres que la capital, la villa de Cuaña, tien 193.

El monasteriu de Cartavio ye'l dueñu del territoriu nes primeres dómines de la Edá Media, hasta que les tierres d'entre'l Navia y l'Eo son donaos al obispáu d'Uviéu pol rei Alfonso VII pa finar les disputes ente esta mitra y la luguesa, pasando la so alministración al gran conceyu de Castropol. El conceyu algamará la independencia al mercar los vecinos el tarrén dempués de la desamortización de Felipe II en 1579.

L'espediente d'estudiu de la Xunta Asesora de la Toponimia pa la oficiliación de los nomes de sitiu tradicionales pal conceyu de Cuaña índa nun s'inició.

Cuaña tien siete parroquies:


Villayón


Esti conceyu asítiase na fastera occidental d'Asturies, na cuenca del ríu Navia, que percorre un territoriu bien pindiu, qu'algama l'altor de 1.221 metros nel picu Carondio. Tien una superficie de 132,46 km² que llenda al Norte con Navia, al Este con Valdés Tinéu y Ayande, al Sur tamién con Ayande y al Oeste con Cuaña, Bual y Eilao.

Viven n'esti conceyu 1.543 persones (777 homes y 766 muyeres), con una densidá de población de 12,90 hab/km². El noyu de población más importante ye la capital, el llugar de Villayón, con 165 habitantes.

Villayón apaez como parte del alfoz de Navia nel sieglu XIII, pero pasa a formar parte del obispáu d'Uviéu y del monasteriu de Courias de forma alternativa, hasta que cola desamortización de Felipe II de 1579, ye mercáu pola villa naviega. Nun va ser hasta cola revolución setembrina de 1868 cuando se dixebre'l conceyu de Villayón de Navia.

Villayón nun cuenta cola toponimia tradicional oficializada porque la Xunta Asesora de la Toponimia tovía nun escomenzó'l so llabor nel conceyu.

Tien seis parroquies: