Esti conceyu alcuéntrase na fastera occidental del territoriu asturianu y la so superficie de 112,55
km² tien desniveles suaves ente los 400 y los 800 metros, siendo'l puntu más altu el monte Pedras Apañadas, de 1.204 metros. Llenda al Norte con Santalla d'Ozcos, Samartín d'Ozcos y Pezós, al Este con Ayande y al Sur y al Oeste con Lugo.
Viven en Grandas de Salime 1.036 persones (534 homes y 502 muyeres) y tien una densidá de población de 9 hab/km². El principal noyu'l conceyu ye la villa capital de Grandas de Salime, na parroquia homónima, con 504 habitantes.
De la dómina medieval son dellos documentos que falen del territoriu de Granda, con una estensión mayor al cnceyu d'anguaño, que taba embaxo la influyencia del monasteriu de Vilanova d'Ozcos. Fernando II donará estes tierres al obispáu d'Uviéu, que perderá la so hexemonía cola desamortización del rei Felipe II, en 1579. Los habitantes de la zona mercarán el territoriu en dos lotes: ún taba formáu poles parroquies de Samartín d'Ozcos, Salime, Villarpedre y A Mesa, formando les tres últimes el conceyu de Salime y el primeru, conceyu independiente; l'otru, poles de Granda y Trabada, que se constituirán nel conceyu de Granda. Nun va ser hasta 1836 cuando Salime s'integre nel conceyu de Granda, que yera cabeceru d'un partíu xudicial, renomándose'l conxuntu como Grandas de Salime.
Grandas de Salime tien les formes toponímiques tradicionales oficializaes pol Decretu 37/2007 del 12 d'abril y asoleyaes como ANEXU al mesmu nel BOPA númberu 102 del xueves 3 de mayu.
Esti conceyu tien siete parroquies:
| NOME | SUPERFICIE | POBLACIÓN |
| Grandas de Salime | 29,45 | 800 |
| A Mesa | 12,73 | 33 |
| Negueira | 7,12 | 22 |
| Penafonte | 18,99 | 87 |
| Trabada | 25,07 | 72 |
| Villarpedre | 12,91 | 5 |
| Vitos | 6,28 | 17 |
Mapa parroquial del conceyu Grandas de Salime, dixebráu por colores
No hay comentarios:
Publicar un comentario