Esti conceyu de la cuenca del Nalón, asitiase na zona central del territoriu asturianu, tien una
superficie de 69,42 km² mui montañosa, tando'l so mayor altor nel picu El Retriñón, de 1.862 metros. Llenda al Norte con Piloña, al Este con Casu, al Sur con Ayer y al Oeste con Llaviana.
Tien una población de 898 habitantes (465 homes y 433 muyeres) y una densidá de 12,54 hab/ km². El llugar de Rusecu, capial del conceyu y asitiáu na parroquia d'Oviñana, ye'l nucleu más pobláu gracies a los sos 360 habitantes.
El nome del conceyu provién del términu llatinu "super scolupum", esto ye, "sobre l'escobiu", lo que se desplica pola construción na dómina de los romanos d'una fortaleza sobre'l ríu Nalón, cola fin de protexer la ruta al puertu de Tarna. Esti castiellu sedrá cedíu pol rei Fernando II a la Orde de Santiagu, nel añu 1185. Alfonso IX, en 1344, otorgará la Carta Puebla al territoriu, fundando la Pola de Sobrescobiu (el llugar de La Polina, n'Oviñana, anguaño); pero nun va ser hasta l'añu 1504, tovía baxo'l poder de la Orde de Santiagu, cuando'l conceyu alquiera l'alministración municipal. Finalmente, en 1568, el rei Felipe II concede al conceyu l'autonomía alministrativa, dempués del litixu pola subasta de la vela ente los vecinos y el rexidor d'Uviéu, Pedro Solís.
El Decretu 10/2009 del 4 de febreru, asoleyáu nel númberu 36 del BOPA, del vienres 13 de febreru, oficializa los topónimos tradicionales del conceyu pal desendolque del so usu nes estayes alministratives y publiques. Les formes aprobaes apaecen nel ANEXU 1 que completa al decretu.
Sobrescobiu tien trés parroquies:
| NOMES | SUPERFICIE | POBLACIÓN |
| Llaínes | 14,07 | 50 |
| Oviñana | 19,73 | 568 |
| Soto | 35,63 | 280 |
Mapa parroquial del conceyu de Sobrescobiu, dixebráu en colores
No hay comentarios:
Publicar un comentario