Ribedeva ye'l conceyu más oriental del territoriu asturianu, llendando con Cantabria pol Este, col
mar Cantábricu al Norte, con Peñamellera Baxa al Sur, y con Llanes al Oeste. La so superficie, de 35,66 km², ta dividíu por tres sistemes montañosos: la sierra del Cuera, la de García y la de Tina, alcontrando'l mayor altor nos 605 metros del cuetu Tabladiellu.
Viven ellí 1.865 persones (917 homes y 948 muyeres), lo que fai una densidá de población de 53,47 hab/km², siendo'l nucleu de población más habitáu la villa capital de Colombres, na parroquia del mesmu nome.
Apaez mencionada por primer vez en dos documentos del archivu de San Salvador de Celoriu (1157 y 1169), falando'l más nuevu d'un tenente d'"Aguilar y Ribadedeva". El territoriu de Ribedeva, al empar que les dos Peñamelleres, va dixebrase de l'Asturies d'Uviéu pa pasar a formar parte de l'Asturies de Santiyana, coles reformes alministratives de Fernando III de Castiya y Lleón de 1230 (momentu cuando dambos reinos se xunen na so persona), pesie a qu'eclesiásticamente siguirá dependiendo de la mitra uvieína. En 1376, Alfonso XI otorga-y la potestá de eleición de conceyales y xueces propios, anque'l poder señorial de la familia Noriega caltendráse hasta que entre a formar parte del Correximientu de les Cuatro Villes y, dempués, al Bastón de Laredo. Pal sieglu XVIII el conceyu algamará la categoría de "Real Valle de Ribadedeva", polo que queda exentu del pagu d'alcabales, tolos sos habitantes pasen a ser fidalgos y cada pueblu pue llamar a conceyu y nomar rexidor propiu. En 1833, la reforma alministrativa de Javier de Burgos inclui'l conceyu dientro d'Asturies.
El decretu 27/2007, de 22 de marzu, espublizáu nel BOPA númeru 88 del 17 d'abril de 2007, fai oficiales los nomes tradicionales del conceyu, que queden recoyíos nel ANEXU 1 al mesmu.
Ribedeva tien trés parroquies:
| NOME | SUPERFICIE | POBLACIÓN |
| Colombres | 16,65 | 1.354 |
| Noriega | 14,22 | 327 |
| San Juan | 4,79 | 184 |
No hay comentarios:
Publicar un comentario