Llaviana ye un conceyu asitiáu na cuenca del ríu Nalón, nel centru del territoriu asturianu. Tien
una superficie de 130,99 km², dixebrada ente la vega del ríu y les montañes de medianu altor, ente les que destaca Peña Mea, con 1.560 metros.
Viven ellí 14.160 persones (6.851 homes y 7.309 muyeres), lo que fai una densidá de población de 107,5 hab/ km². Los 8.874 habitantes de La Pola Llaviana, faen que la capital seya'l nucleu más pobláu del conceyu.
Esiste na Edá Media una demarcación d'importancia estratéxica, pola ruta que cruzaba el Nalón hasta Tarna, col nome de "Flaviana", que mandara representantes al conceyu eclesiásticu ovetense del añu 1115 y, pesie al dominiu territorial del monasteriu de San Vicente, con un cargu adscritu al so gobiernu. Algamará la Carta Puebla nel añu 1344, anqu'l nucleu de la villa yá tuviera importancia dende'l sieglu XIII. La desamortización fecha por Felipe II favorecerá al conceyu pola incorporación del cotu d'Entrialgu. Y nun sedrá hasta'l XIX cuando los cotos de Villoria y Tiraña, anantes de xurisdicción nobiliaria, se incorporen al conceyu, pa nun camudar yá más el territoriu llavianetu.
El Decretu 281/2007 del 19 d'avientu, espublizáu nel BOPA númberu 3 del vienres 4 de xineru de 2008, establez como oficiales les formes toponímiques tradicionales pal conceyu, axuntaes pol ANEXU 1 al decretu.
Llaviana tien ocho parroquies:
| NOMES | SUPERFICIE | POBLACIÓN |
| Carrio | 2,43 | 125 |
| El Condao | 17,68 | 652 |
| Entrialgo | 6,87 | 251 |
| Llorío | 27,37 | 756 |
| La Pola Llaviana | 9,80 | 9.095 |
| Tiraña | 19,08 | 1.948 |
| Tolivia | 16,86 | 233 |
| Villoria | 30,90 | 1.100 |
No hay comentarios:
Publicar un comentario