Amieva ye un conceyu montañosu del Oriente d'Asturies, que llenda con Parres al Norte,
Cangues d'Onís al Este, Lleón al Sur y Ponga al Oeste. Alcuéntrase nel macizu de los Picos d'Europa y el so mayor altor ye'l Picu La Torre'l Mediu, de 2.465 metros.
Tien una superficie de 113, 90 km² y una población de 805 habitantes (426 homes y 379 muyeres), lo que fai un densidá de poblamientu de 7,06 hab/ km². El llugar d'Amieva, na parroquia homónima, ye'l núcleu más habitáu con 105 habitantes, mientres que'l lugar de Sames, capital del conceyu na parroquia de Mián, tien 74.
Amieva cítase en dellos documentos como territoriu yá nel sieglu X, pola so importancia como pasu ente la Meseta y Asturies, pero nun va ser hasta la XIV dómina cuando apaezca como conceyu, al dir los sos representantes al aconceyamientu uvieín onde buena parte de los conceyos asturianos sofiten la llexitimidá del rei Pedro frente a Enrique de Trastamara. El conceyu Amieva unviará representantes a Uviéu en 1504, a la Xunta Xeneral de Principáu qu'aprueba como correxidor a don Fernando Álvarez de Toledo; pola documentación qu'apurre tal eventu, podemos saber qu'Amieva tenía dos xueces, un plebeyu y otru noble, cuatro correxidores vitalicios y un alférez mayor. Esta organización caltendrase varios sieglos, como demuestra'l catastru elaboráu pol marques de la Ensenada nel añu 1752.
La capital del conceyu alcontróse nel llugar d'Amieva hasta que, na Edá Moderna, trespasosé a Sames. El pueblu de Cirieñu, en Sebarga, contaba, por embargu, col edificiu del sieglu XV onde yeren escoyíos los procuradores del conceyu y actuaben los xueces. La construcción de la carretera del Pontón a Les Arriondes durante'l sieglu XIX, que siguía'l cursu del ríu Seya, fizo que Sames fuera perdiendo importancia, al quedar aislláu frente a los llugares de Precendi y Santiyán.
Amieva vio cómo s'aprobaba la oficialidá de la aplicación de los toponimos tradicionales col Decretu 5/2007 de 31 de xineru, asoleyáu nel BOPA númberu 48 del martes 27 de marzu de 2007, apaeciendo los nomes nel ANEXU 1 al mesmu.
Amieva tien cinco parroquies:
| NOMES | SUPERFICIE | POBLACIÓN |
| Amieva | 50,21 | 106 |
| Mián | 19,45 | 299 |
| Samartín | 10,41 | 196 |
| San Román | 7,64 | 15 |
| Sebarga | 26,19 | 189 |
No hay comentarios:
Publicar un comentario