Asitiáu en plena Cordillera Cantábrica y nes estribaciones occidentales de los Picos d'Europa,
Ponga ye un conceyu mui abruptu d'unos 205,98 km², tando'l so mayor altor la Peña Ten, de 2.142 metros. Llenda al Norte colos conceyos de Parres y Piloña, al Este con Amieva, al Sur cola provincia de Lleón y al Oeste con Casu.
Ponga tien una población de 678 habitantes (404 homes y 274 muyeres), polo que la so densidá ye de 3,32 hab/ km². El llugar de San Xuan, la capital del conceyu, na parroquia del mesmu nome, ye'l nucleu más habitáu con 150 persones.
La donación del cotu de Cazu del rei Alfonso IX a Pedro García de Caso, nel añu 1188, ye la primera prueba documental onde se cita Ponga, anque los primeros datos de vida alministrativa particular hai que esperalos hasta'l sieglu XIV, cuando alcontramos la esistencia de xueces nobles y plebeyos, alcaldes d'hermandá y cinco rexidores perpetuos. Pal sieglu XVI, el conceyu Ponga yá apaez asitiáu na realidá asturiana, tando integráu nel arcedinatu de Villaviciosa y nel partíu xudicial de Llanes; en 1594 participará na Xunta Xeneral del Principáu, tando representáu por Juan Alonso del Río.
Ponga ye, a fecha d'avientu de 2011, el caberu conceyu n'adoptar la toponimia tradicional asturiana como oficial pa les sos entidaes de población, quedando llexislao pol Decretu 4/2011 del 2 de febreru, que fuera espublizáu nel BOPA númberu 33 del xueves 10 de febreru, xunto al ANEXU 1, onde se contienen les formes aprobaes.
Ponga tien un total de nueve parroquies:
| NOMES | SUPERFICIE | POBLACIÓN |
| Abiegos | 2,87 | 39 |
| El Beyu | 6,75 | 39 |
| Carangres | 12,38 | 10 |
| Casielles | 43,07 | 16 |
| Cazu | 15,97 | 176 |
| San Xuan de Beleño | 23,84 | 160 |
| Sobrefoz | 40,01 | 94 |
| Tarañes | 44,52 | 71 |
| Viegu | 16,57 | 73 |
No hay comentarios:
Publicar un comentario