Onís ye un conceyu asitiáu al Sureste del Principáu, llendando al Norte con Llanes, al Este con
Cabrales, al Sur con Lleón y al Oeste con Cangues d'Onís. Tien una superficie de 75,42 km², vertebrada pol ríu Güeña: al Norte alcontramos les sierres pre-llitorales de menor elevación que'l macizu de Cornión, que forma la parte Sur del conceyu, y onde s'atopa'l so másimu altor, el Picu La verdilluenga, de 2.131 metros.
Viven n'Onís 797 persones (413 homes y 384 muyeres), lo qu'apurre una densidá de población de 10,70 hab/km². La población con mayor númberu d'habitantes ye'l llugar de Benia, capital del conceyu y asitiáu na parroquia d'Onís, con 239 persones.
La primera documentación onde apaez asoleyáu Onís como conceyu vien de la so representación, por parte de Pedro Suárez, na Xunta d'Uviéu que sofitaba'l rei don Pedro a la escontra d'Enrique de Trastámara, pal sieglu XIV. Pero nun va ser hasta 1509 cuando se refieran a l'alcaldía d'Onís y, hasta 1594, cuando tenga representación na Xunta Xeneral. Unos años enantes, en 1582, prodúzse la dixebra ente'l conceyu y Cangues d'Onís mediante un conceyu onde se remarcaron y establecerion les llendes ente dambos. Nel sieglu XVIII, Cangues intentará anexionar Onís, pero esti caltendrá la so independencia.
A nivel parroquial, nel sieglu XIV, apaecen referencies a una sola parroquia, la de Santolaya. Va ser pa'l añu 1752 cuando se describan dos nueves parroquies, Demués y La Robellada. Estes trés son realidaes alministratives son les que se caltienen anguaño, pesie al camudamientu de nome pa la primixenia (Santolaya pasó a ser Onís) y pa la meridional (Demués pasa a ser Bovia).
Onís índa nun escomenzó'l procesu d'oficialización de la toponimia tradicional.
Estes son les parroquies d'Onís:
| NOMES | SUPERFICIE | POBLACIÓN |
| Bovia | 46,05 | 113 |
| Onís | 14,48 | 534 |
| La Robellada | 14,53 | 150 |
No hay comentarios:
Publicar un comentario