El conceyu fúndase'l 17 d'ochobre de 1270, cola carta pola robrada pol rei Alfonso X en Vitoria, col nome de Pola de Maliayo, al ser esti'l nome que recibía la comarca onde se va asitiar, con capital nuna villa fundada nel llugar de Buetes, nel escomienzu d'una ría. Casi ochenta años dempués, y una vegada superaos los conflictos d'intereses territoriales y xurídicos pa colos monasterios de Valdediós y San Pelayo d'Uviéu, que consoliden al conceyu, el nome la pola camuda pol de "Villaviçiosa", como se noma por vez primera nun documentu del 15 de xunu de 1347. Nunca nun más se volviera a usar el términu "Maliayo" de forma oficial. Nun se conocen les motivaciones pal camudamientu de nome, si bien se plantega'l neoloxismu como un llaváu d'imaxen, lo que queda claro coles pallabres de Tirso d'Avilés en Armas y linajes del Principado de Asturias, cuando diz: "La villa de Villaviciosa es en Asturias; que por ser su sitio en lugar tan apacible y fértil de todas cosas, tengo entendido que tuvo este sobrenombre; porque goza del mar y de la opulencia de la tierra". Al respeutu del cambiu de nome, alcontramos un prestosu estudiu del profesor Juan Ignacio Ruiz de la Peña, De la Puebla de Maliayo a Villaviciosa. Notas de Historia y Toponimia.
Villaviciosa ye un municipiu que s'estiende por una superficie de 276,23 km², na costa centro-oriental asturiana, siendo l'accidente xeográficu más notable la ría del mesmu nome, declarada Reserva Natural Parcial en 1995. El conceyu presenta una suave cuesta dende la llinia la costa, onde s'alternen sableros y escobios, hasta l'interior, formáu de grandes, valles y llombes d'escasu altor, siendo'l puntu más eleváu del conceyu'l monte Cualmayor, na llinde con Colunga, de 322 metros. Amás de con Colunga pol Este, llinda al Sur con Sariegu, Nava, Cabranes y Piloña, al Oeste con Xixón y Siero y al Norte col mar Cantábricu.
Tien una población de 14.840 habitanes (7.294 homes y 7.546 muyeres), lo que supón una densidá de 52,56 hab/km². La villa de Villaviciosa, capital del conceyu, ye'l núcleu de población que cuenta con mayor númberu d'habitantes: 3.241. [Datos del SADEI a 2010]
En virtú del decretu 115/2005 de 17 de payares de 2005, espublizáu nel BOPA númberu 279 del 2 d'avientu, (posteriormente rectificáu nes errates nel boletín númberu 8 del 12 de xineru de 2006) foron aprobaes les formes oficiales de los topónimos del conceyu de Villaviciosa, pasando a ser oficiales en tolos casos les denomaciones n'asturianu, sacante nos casos de San Justo/San Xusto y Santa Eugenia/Santoxenia, en qu'optose por caltener una denomación billingüe.
Villaviciosa tien 41 parroquies.
| NOME | SUPERFICIE | POBLACIÓN |
| Amandi | 5.06 | 526 |
| Argüeru | 12,40 | 557 |
| Arnín | 1,24 | 7 |
| Arroes | 10,24 | 410 |
| Bedriñana | 8,77 | 204 |
| Breceña | 6,71 | 84 |
| El Bustiu | 1,55 | 53 |
| Camoca | 3,51 | 136 |
| Candanal | 13,11 | 234 |
| Carda | 3,51 | 60 |
| Careñes | 3,31 | 183 |
| Castiellu | 7,24 | 381 |
| Cazanes | 5,47 | 139 |
| Celada | 5,69 | 138 |
| Coru | 5,47 | 89 |
| Fuentes | 4,65 | 108 |
| Grases | 2,78 | 115 |
| La Llera | 2,17 | 13 |
| Llugás | 3,71 | 79 |
| La Madalena | 2,89 | 51 |
| Miravalles | 8,06 | 174 |
| Niévares | 3,93 | 64 |
| Oles | 10,22 | 427 |
| Pion | 18,07 | 432 |
| Priesca | 4,03 | 99 |
| Pueyes | 9,61 | 222 |
| Quintes | 5,58 | 585 |
| Quintueles | 9,81 | 674 |
| Rales | 3,40 | 34 |
| Rozaes | 13,22 | 156 |
| Samartín de Vallés | 9,29 | 91 |
| Samartín del Mar | 6,09 | 248 |
| San Pedru Ambás | 4,24 | 135 |
| Santoxenia | 2,99 | 46 |
| San Xusto | 11,47 | 419 |
| Seloriu | 22,36 | 526 |
| Tazones | 3,51 | 251 |
| Tornón | 5,79 | 218 |
| Valdebárcena | 9,28 | 161 |
| Villaverde | 4,86 | 179 |
| Villaviciosa | 1,95 | 6.132 |
No hay comentarios:
Publicar un comentario