Sariegu ye un conceyu asitiáu ente los de Xixón, Villaviciosa, Nava y Siero, que lu alrodien, y que lu forma'l valle del ríu Nora, que ñaz nel conceyu, y les llombes que lu enmarquen, siendo l'altor más destacable'l picu Fariu, de 731 metros.
La primer referencia documental de Sariegu alcontrámosla na donación del valle de Sariegu del rei Bermudu II y la reina Elvira al monasteriu de San Pelayo d'Uviéu, p'hacia l'añu 996. El territoriu sareganu va repartiéndose ente los alfoces de Maliayo y de Siero, recibiendo'l so nomamientu como conceyu por primer vez de la mano del rei Alfonsu X, nel sieglu XIII, pero les protestes de los monasterios de Valdediós y San Pelayo fadrá que'l rei camude d'opinión. Sicasí, durante la Edá Media, el conceyu contará con un alférez mayor, rexidores y dos xueces, calteniendo la so personalidá independiente hasta que se consolide cola creyación de la Xunta Xeneral del Principáu, onde Sariegu participaba como conceyu de realengu con procurador propiu y votu nes decisiones.
Sariegu ye un conceyu pequeñu, de 25,72 km² d'estensión, y con una población de 1.322 habitantes (632 homes y 690 muyeres), algama una densidá de población de 51,73 hab/km². La población ta mui dispersa en pequeños núcleos, siendo'l más pobláu la capital, el llugar de Vega, na parroquia de Santiago, que tien 124 habitantes.
La toponimia oficial del conceyu quedó establecida coles sos formes tradicionales col decretu 116/2005 del 17 de payares, espublizáu nel númeru 279 del BOPA del vienres 2 d'avientu d'esi mesmu añu. Los nomes quedaron recoyíos nel ANEXU I al decretu.
El conceyu ta formáu por trés parroquies:
| NOMES | SUPERFICIE | POBLACIÓN |
| Narzana | 9,28 | 399 |
| San Román | 6,55 | 213 |
| Santiago | 9,89 | 710 |
No hay comentarios:
Publicar un comentario