El nome del conceyu fala nidio de les sos carauterístiques físiques: los sos 106,69 km² asitiense nos llanos pal Norte del ríu Nora, siguiendo p'hacia l'Oeste la nomada "llanera de Siero". La so elevación más importante ye'l picu Gorfolí, de 617 metros.
Lo afayaízo del tarrén fizo que yá los romanos s'aposentare elli, na mansio (una parada oficial de les calzaes romanes, sofitaes pol Imperiu) de "Lucus Asturum", l'actual Llugo.
La documentación medieval de trespase de propiedaes ye bayurosa pa esti conceyu, destacando les donaciones de los monarcas asturianos a diferentes monasterios; anque, sobre toos, a la Ilesia mayor d'Uviéu, que fadrá del obispu el mayor terrateniente de la zona. Poro, mientres los sieglos XIV y XV, l'alministración de Llanera dependiera del Obispáu uvieín, asociándola a la de Les Regueres, mediante la figura del encomenderu (escoyíu d'ente una de les families nobles del llugar). Les tensiones ente paisanos y encomenderos fueron abondes, hasta'l puntu de qu'una rebelión de principios del XV acabaría cola escomunión de tola población por decisión del obispu don Guillén: ye lo que se conoz col nome de "los esconxuraos". Col reináu de Felipe II, nel sieglu XVI, Llanera pasa a ser concyu de realengu, pero'l conceyu d'Uviéu merca'l tarrén ensin consentimientu vecinal. Poro, los enfrentamientos volverán apaecer, hasta que ná dómina del XIX, el conceyu algama la independencia y l'asientu númberu 39 na Xunta Xeneral.
El conceyu llinda con Corvera al Norte, con Xixón y Siero al Este, con Uviéu al Sur y con Les Regueres y Illas al Oeste.
Anguaño viven en Llanera 13.919 persones (6.884 homes y 7.035 muyeres), con una densidá de población de 130,46 hab/km². La estación de Llugo, con 3.410, ye'l núcleu más habitáu, siguíu de cerca pol llugar de Posada, parroquia de Rondiella, que ye la capital del conceyu, con 3.243.
El conceyu llaneranu índa nun oficializó la so toponimia tradicional, alcontrándose col procesu abiertu a fecha de güei. Pa faer los mapes, uso los nomes apurríos como tradicionales pel SADEI na so páxina, que coinciden colos d'otres espublizaciones, como ye la entrada "Llanera" na Uiquipedia. Espublizaos dambos na mío páxina de Facebook, nun recibieron comentariu dengún pa correxilos, polo que los doi por buenos.
Llanera tien once parroquies.
| NOMES | POBLACIÓN | SUPERFICIE |
| Ables | 354 | 3,01 |
| Arlós | 392 | 11,58 |
| Bonielles | 185 | 5,79 |
| Cayés | 502 | 6,01 |
| Ferroñes | 198 | 9,35 |
| Llugo | 4.676 | 16,48 |
| Pruvia | 2.553 | 10,14 |
| Rondiella | 3.427 | 5,90 |
| San Cucao | 696 | 13,02 |
| Santa Cruz | 270 | 12,71 |
| Villardebeyo | 666 | 12,70 |
No hay comentarios:
Publicar un comentario