El tercer conceyu en población y ún de los de más imporancia hestórica d'Asturies ye'l d'Avilés.
Nel añu 1085, el rei Alfonsu VI de Lleón dio-y'l fueru de villa de realengu al asentamientu que yá esistía dende dómina romana: el documentu, que se conserva nel archivu municipal, tien un gran valir hestóricu, xurídicu y tamién llingüísticu, al tar redactáu n'asturianu medieval, con grande influencia provenzal, lo que fala del vínculu comercial de la villa colos puertos franceses. Nómase n'esti documentu a la villa "Abiliés". Anguaño tamién s'usa, como reconstrucción del topónimu medieval, "Aviyés".
El conceyu asítiase na fastera occidental del cabu Peñes, al rodiu de la ría d'Avilés. Llinda col conceyu de Gozón al Este; col de Corvera, al Sur; colos de Castrillón y Illas al Oeste; y col mar Cantábricu al Norte. Cuenta con una superficie de 26,81 km². El so techu ye l'altu Miranda, con 143 metros.
Pesie tar nel puestu 72 en cuanto a tamañu, ye'l tercer conceyu más pobláu, con 84.202 habitantes (40.352 homes y 43.850 muyeres), polo que la so densidá de población ye elevadísima: 3.140 hab/km². La villa d'Avilés, parroquia urbana y capital del conceyu, ye'l núcleu más pobláu, con 79.105 habitantes. [Datos del SADEI a 2010]
La toponimia tradicional ye oficial nel conceyu dende la espublicación nel BOPA númberu 281 del sábadu 4 d'avientu de 2010 del Decreto 145/2010, 24 de noviembre, por el que se determinan los topónimos oficial del concejo de Avilés.
Mapa parroquial d'Avilés en color.
| NOME | NOME OFICIAL | SUPERFICIE | POBLACIÓN |
| Avilés | Avilés | 8,78 | 79.105 |
| La Madalena | La Madalena de Corros | 2,50 | 605 |
| Miranda | Miranda | 2,93 | 1.600 |
| San Cristoba | San Cristoba/ San Cristobal d'Entreviñas | 4,02 | 1.687 |
| San Xuan de Nieva | San Xuan de Nieva | 0,22 | 15 |
| Valliniello/Navarro | Valliniello/Navarro | 8,36 | 1.190 |
No hay comentarios:
Publicar un comentario