Cangues d'Onís

Mapa parroquial de Cangues d'Onís

Ye un conceyu asitiáu nel Oriente asturianu, con una superficie de 212,75 km², onde s'aprecien les depresiones de los ríos Seya y Güeña y les altures de les sierres pre-llitorales, al Norte, y del macizu de Cornión, parte de los Picos d'Europa, al Sur. El so másimu altor alcuéntrase nel Picu Peñasanta, tamién nomáu EL Cornión (2.479 metros). Llenda al Norte con Parres y Ribeseya, al Este con Llanes y Onís, al Sur con Lleón y Amieva y al Oeste con Parres y Amieva.

Tien una población de 6.756 habitantes (3.321 homes y 3.435 muyeres) y una densidá de población de 31,9 hab/ km². El nucleu más pobláu ye la villa de Cangues d'Onís, capital del conceyu y asitiada na parroquia del mesmu nome, con 3.942 habitantes.

Históricamente, pesie a que'l nucleu de Cangues ye asimiláu pola ñaciente monarquía asturiana como capital, nun va ser hasta'l sieglu XII cuando s'escomience a usar una demarcación territorial propia, ensin qu'esista un apelativu que otorga-y. Va ser nun inventariu del obispáu d'Uviéu del sieglu XIV onde s'atope por primer vez la referencia "Cangues d'Onís"; nesa mesma dómina, Alfonso Enríquez, conde de Noreña, herieda del so pa natural Enrique II de Castiya el territoriu, que apaez con esi mesmu nome nel testamentu, pa pasar a manes reales dempués de la derrota'l conde y l'advenimientu del Principáu. A primeros del sieglu XVI, yá apaez el términu con autoridá de conceyu (si bien, xunida a Onís) pa una Xunta Xeneral. La dixebra de dambos conceyos produciráse pal añu 1582.

Cangues d'Onís, pol Decretu 8/2009 del 4 de febreru, asoleyáu nel BOPA númeru 36 del vienres 13 de febreru de 2009, respeta de mena oficial los topónimos tradicionales recoyíos nel ANEXU 1 al mesmu, calteniendo les formes billingües pa les dos entidaes poblacionales más característiques: Cangues d'Onís/Cangas de Onís y Cuadonga/ Covadonga.

Asina, les once parroquies cangueses son les siguientes:

NOMES	SUPERFICIE	POBLACIÓN
Abamia	14,47	614
Cangues d'Onís	27,22	4.326
Cuadonga	2,54	58
Llabra	9,01	119
Margolles	19,01	223
Mestas de Con	13,30	403
La Riera	80,88	71
Samartín de Grazanes	15,30	214
Triongu	12,45	243
Villanueva	6,17	201
Zardón	12,05	99

Mapa parroquial del conceyu de Cangues d'Onís, dixebráu en colores