Col territoriu más accidentáu de tola xeografía asturiana, el conceyu Cabrales asítiase na fastera
surooriental, en plenos Picos d'Europa. Llenda al Norte con Llanes, al Este con Peñamellera Alta, al Sur con Cantabria y Lleón y al Oeste con Onís. Los sos 238,29 km² de superficie tienen el so puntu de másimu altor nel Picu Urriellu, techu d'Asturies, colos sos 2.648 metros.
Tien una población de 2.253 persones (1.154 homes y 1.099 muyeres), lo que fai una densidá de población de 9,40 hab/km². El nucleu más pobláu ye la villa d'Arenas, onda la parroquia homónima, con 836 habitantes, mientres que'l llugar de Carreña, la capital del conceyu, acuenta 320 almes.
Nuna donación del sieglu XII a la ilesia de San Pedro de Camarmeña alcuéntrase una descripción del territoriu de Cabrales, anque la documentación mientres la Edá Media ye bayurosa pa esti territoriu siempre de realengu. Nun va ser hasta sieglu XIV cuando apaezca Cabrales como conceyu, pa sofitar nÚviéu la coronación del rei Pedro y pa la Xunta Xeneral de 1444. La política llocal tuviere dominada poles families de los Bárcena y los Gonzáles de Buerdo hasta'l sieglu XVII, cuando los conceyales tarán escoyíos añalmente pola decisión de los representantes territoriales, tando dixebráu'l conceyu en cuatro.
Cabrales ye ún de los quince conceyos asturianos que tovía nun escomenzaron el trabayu de recoyida de los nomes tradicionales como primer pasu del procesu d'oficialización de la toponimia tradicional. Pa esti trabayu, volvemos contar col sofitu documental apurríu pola SADEI y polos artículos de la uiquipedia al respeutu'l conceyu (datos que, n'esti casu, coinciden dafechu).
Esti conceyu tien nueve parroquies:
| NOMES | SUPERFICIE | POBLACIÓN |
| Arenas | 20,15 | 895 |
| Berodia | 13,51 | 188 |
| Bulnes | 56,31 | 39 |
| Carreña | 19,95 | 430 |
| Po | 10,28 | 168 |
| Prau | 20,87 | 193 |
| Puertas | 15,93 | 141 |
| Sotres | 38,10 | 128 |
| Tielvi | 43,15 | 71 |
No hay comentarios:
Publicar un comentario