Esti conceyu asitiase nel centru del país, ente los ríos Nora y Nalón. Llenda al Norte con Illas y Llanera, al Este con Uviéu y Llanera, al Sur con Grau y al Oeste con Candamu.
Tien una superficie de 65,86 km² de montes y cotes d'escasu altor, onde destaquen los 686 metros de La degollada. Viven en Les Regueres 2.003 persones (997 homes y 1.006 muyeres), polo que tien una densidá de población de 30,42 hab/km². El llugar de L'Escampleru, na parroquia de Valsera, ye'l nucleu de mayor población gracies a los sos 203 habitantes, pero la capital ta nel llugar Santuyanu (onde la parroquia del mesmu nome), que tien 126.
Dende la dómina del monarca Alfonso VII, el territoriu foi dependiente de la mitra uviéina, gobernándose con correxidores, hasta qu'en 1421, l'obispu d'Uviéu Diego, otorga la Carta Puebla al conceyu, dando-y una mayor autonomía, pero calteniéndolu como tributariu. Va ser cola desamortización de Felipe II en 1587 cuando Les Regueres seya reconocíu como municipiu independiente dafechu, cola capitalidá en Viau, d'onde pasará más alantre a l'actual Santuyanu.
Les Regueres ye ún de los quince conceyos qu'índa nun aniciara'l procesu de recuperación de la toponimia tradicional. Algamo los topónimos qu'apurren como tradicionales la SADEI y l'ALLA.
Tien seis parroquies:
| NOMES | SUPERFICIE | POBLACIÓN |
| Biedes | 10,53 | 285 |
| Santuyanu | 9,01 | 362 |
| Sotu Les Regueres | 5,61 | 145 |
| Tresmonte | 12,33 | 321 |
| Valdunu | 14,84 | 286 |
| Valsera | 13,53 | 604 |
Mapa parroquial del conceyu de Les Regueres, dixebráu en colores.
No hay comentarios:
Publicar un comentario