El conceyu de Somiedu asítiase nun de los terrenos más accidentaos de la xeografía asturiana,
con elevaciones, que lleguen a los 2.194 metros del picu El Cornón y valles estensos y pronunciaos como son el de Somiedu, el del ríu Pigüeña y el de Saliencia. Tien una estensión de 291,39 km² y llenda al Norte con Miranda, al Este con Teberga, al Sur con Lleón y al Oeste con Tinéu y Cangas.
Viven en Somiedu 1.410 persones (788 homes y 622 muyeres), polo que la densidá de población llega al 5,29 hab/km². El nucleu de población más destacáu ye la villa capital de La Pola, con 186 habitantes.
La hestoria'l conceyu vien definida pol trazáu del Camín Real de la Mesa, trazáu romanu de conexón pa cola Meseta. Gracies a les donaciones de la monarquía asturiana, dellos fortificaciones y monasterios diben fundase a la vera'l camín, xenerando un poder nobiliariu y monásticu, que se diba ver amenazáu pol poder arzobispal y, toos ellos encontraos coles protestes del pueblu llanu y, n'especial, de la xente vaqueiro. D'esta miente, el poder del monasteriu de Miranda na zona, veráse llimitáu pola carta pueblu otorgada al conceyu, que funda la pola n'Augüera (parroquia'l conceyu de Miranda anguaño), pa dempués pasar a l'actual La Pola. Mientres el sieglu XIV, la familia de Quiñones acapara'l poder nel territoriu y, anque los Reis Católicos incorporen el conceyu a la Corona en 1496, quitándo-yos tolos privilexos, el poder nobiliariu caltandráse nes manes de los llinaxes de Miranda, Flórez y Omaña. En 1827 suprímese'l réximen señorial, pasando'l conceyu a manes del pueblu. El territoriu somedanu acabará definise dafechu nel sieglu XIX, coles incorporaciones del cotu de Arguinu y Perḷḷunes, el de Gúa y Caunéu y el de Clavichas y Valcárcel.
Esti conceyu índa nun tien aporbada por decretu la oficialidá de los sos topónimos tradicionales, pero la Xunta Asesora de la Toponimia yá iniciara'l so estudiu.
Somiedu tien 15 parroquies:
| NOME | SUPERFICIE | POBLACIÓN |
| Aguinu | 14,82 | 21 |
| Clavichas | 13,04 | 87 |
| Corés | 7,50 | 28 |
| El Coutu | 7,36 | 65 |
| Éndriga | 36,92 | 125 |
| Gúa | 25,77 | 137 |
| Las Morteras | 13,03 | 64 |
| Pigüeces | 25,87 | 77 |
| Pigüeña | 22,55 | 118 |
| La Pola | 19,00 | 218 |
| El Puertu | 10,96 | 77 |
| La Riera | 8,96 | 102 |
| El Vaḷḷe | 29,76 | 118 |
| Veigas | 20,30 | 70 |
| Viḷḷar de Vildas | 35,54 | 103 |
Mapa parroquial del conceyu de Somiedu, dixebráu en colores.
No hay comentarios:
Publicar un comentario