Uviéu

Mapa parroquial d'Uviéu.

Tocá-y la vez al conceyu d'Uviéu, onde s'asitia la capital d'Asturies, la mui noble, mui lleal, benemérita, invicta y buena ciudá d'Uviéu y see de l'archidiócesis y de la universidá.

Allúgase nel centru'l país, al rodiu del monte Naranco y regáu polos ríos Nora, Nalón y Trubia. Llinda con Siero y Llangréu al Este; con Llanera y Les Regueres, al Norte; con Gráu al Oeste; y con Santu Adrianu, Riosa y Mieres, al Sur. Tien una superficie de 186,65 km². El so puntu más altu ye'l Picayu, con una cota másima de 714 metros.

Viven ellí 225.155 persones (105.251 homes y 119.904 muyeres). Con una densidá de población de 1.206 hab/km², ta empadronáu nel conceyu'l 20,76 % de la población d'Asturies. El so nucleu de población más habitáu ye la ciudá d'Uviéu, con 190.579 habitantes. [Datos del SADEI a 2010]

Uviéu índa nun tien normalizada la toponimia tradicional, alcontrándose'l so estudiu nun procesu de revisión. P'algamar la denominación asturiana de les parroquies uvieínes, tiro de varies fuentes:

· de los nomes tradicionales que s'apurren na páxina del SADEI;

· d'un trabayu de Margarita Fernández Mier nomáu Conceyu d'Uviéu: Parroquia de San Cloyo, Cuadernu de "Toponimia" númberu 18, de l'Academia de LLingua Asturiana (referencia apurría por Xosé Ignaciu Muñiz Domingues pa esclariar l'usu'l términu Les Cruces/San Esteban), onde, nuna nota, s'establez un llistáu de nomes "más afayaízos pa la denominación asturiana" de les parroquies, siguiendo les obres de Fermín Canella (1887), Ciriaco Miguel Vigil (1889) y Pascual Madoz (1845-1850);

· el trabayu bayurosu de la Uiquipedia, que tien entrada pa caúna les 30 parroquies uvieínes.

Esta diversidá de fuentes fai que tamién heba nomes que nun tean claros, bien porque camuden dalguna lletra d'una a otra, bien porque apurran varios nomes diferentes pa una mesma parroquia. El criteriu pa la escoyeta'l topónimu usau nel mapa foi garrar el que más entraes iguales presentare ente les fuentes.

Na siguiente tabla (onde axuntare amás la población y la estensión de la parroquia) voi tratar d'axuntar tolos nomes atopaos, tomando como cabezaleru l'escoyíu pal mapa.

MAPA	SADEI	ALLA	UIQUIPEDIA	Hab.	km²
Agüeria	Agüeria	Tudela Agüeria	Agüeria	755	9,42
Bendones	Bendones	Bendones	Bendones	241	3,35
Box	Box	Box	Box	883	6,48
Brañes	Brañes	Brañes	Brañes	75	9,11
Caces	Caces	Caces	Caces	277	4,77
Godos	Godos	Godos	Godos	670	2,23
Llatores	Llatores	Llatores	Llatores	667	5,67
Lliño	Lliño	Lliño	Lliñu	339	5,97
Llimanes	Llimanes	Llimanes	Llimanes	867	3,95
Lloriana	Lloriana	Lloriana	Lloriana	245	5,98
La Manxoya	La Manxoya	La Manxoya	La Manxoya	947	6,17
Naranco	Naranco	Naranco	Naranco	92	536
Naves	Naves	Naves	Naves	108	1,83
Olloniego	Olloniego	Olloniego	Olloniego	1.148	11,64
Pando	Pando	Pando	Pando	130	1,62
Perera	Perera	Perera	Perera	170	4,46
Piedramuelle	Piedramuelle	Piedramuelle	Piedramuelle	524	3,85
Pintoria	Pintoria	Pintoria	Pintoria	52	2,93
Priorio	Priorio	Priorio	Priorio	419	4,86
Puerto	Puerto	Puertu	Puerto	201	4,66
San Cloyo	San Cloyo	San Cloyo	San Cloyo	2,534	7,80
San Esteban	San Esteban	San Esteban de les Cruces, Les Cruces	San Esteban	960	7,69
San Pedru Nora	San Pedru Nora	San Pedro Ñora	San Pedru Nora	103	4,14
Santianes	Santianes	Santianes	Santianes	86	1,32
Santolaya	Santolaya	Manzanea	Santolaya	201	3,44
Sograndio	Sograndio	Sograndio	Sograndio	497	3,97
Trubia	Trubia	Trubia	Trubia	2.058	14,59
Udrión	Udrión	Udrión	Udrión	125	1,32
Uviéu	Uviéu	Uviéu	Uviéu	209.549	26,33
Villaperi	Villaperi	Villaperi	Villaperi	332	10,84

Por último, nel mapa incluyo trés parroquies hestóriques, índa d'importancia y con personalidá propia, pesie tar asitiaes na parroquia urbana d'Uviéu: Cualloto/Colloto, Santuyanu y San Pedro los Arcos/San Pedro l'Otero/Los Pilares. Nomes toos ellos apurríos pol documento de Fernández Mier.

Mapa parroquial d'Uviéu en color.