La decisión de xunir nun mesmu mapa esos dos conceyos vien por un criteriu de practicidá, al alcontrase Noreña rodiáu pol de Siero. A la mío forma de ver, d'esta miente, el conceyu noreñense queda meyor asitiáu xeográficamente, al ufiertar les parroquies sierenses como puntos de referencia. Que naide de Noreña se sienta amenorgáu por esti fechu. Y, pola mesma razón, que naide de Siero tampoco.
Siero
La primer referencia al nome de Siero apaez nel 905 na donación d'Alfonsu III a la diócesis d'Uviéu de les ilesies de Santa María y de Samartín de Siero. Alfonsu X concederá "a los homes de la tierra de Siero" la carta puebla en 1270, onde s'establecen les llindes del conceyu y la capital: La Pola Siero.
En 1504 constítuise oficialmente l'ayuntamientu de Siero. Nel sieglu XIX, el conceyu de los marqueses de Santa Cruz de Marcenao xúnese a Siero, a la empar que La Paranza y Carbayín y los cotos de Llimanes, Tiñana y Valdesoto. En 1833 algamará la so forma actual, dempués de la independencia de Noreña, integráu nel conceyu siete años enantes.
Siero ye un territoriu principalmente llanu, de suaves pendientes salvo na zona oriental, onde s'alcuentren pequeñes cordales. La zona centro-occidental suel nomase como "llanera de Siero". El picu Fariu, colos sos 734 metros, ye'l techu'l conceyu. El ríu Nora y el Noreña, afluente del anterior, son les principales cuenques fluviales. Tien una superficie de 221,23 km².
Llenda al Norte con Xixón, al Este con Villaviciosa, Sariegu, Nava y Bimenes, al Sur con Llangréu y Samartín del Rei Aurelio, y al Oeste con Uviéu y Llanera. Tien comu enclave al conceyu de Noreña.
Ye'l cuartu conceyu más populosu d'Asturies, col 4,65% de los sos habitantes, gracies a les 51.730 persones (25.286 homes y 26.444 muyeres) que viven n'elli. La densidá de población ye de 244,9 hab/km². Esisten varios núcleos de población destacaos: El Berrón (3.448 hab.), en La Carrera; l'Urbanización de La Fresneda (4.189 hab.), en Viella; La Pola de Siero (12.363), villa capital del conceyu, na parroquia del mesmu nome; y Llugones (12.625), llugar de la parroquia homónima y núcleu más pobláu del conceyu.
El Boletín Oficial del Principáu d'Asturies númberu 186 del 11 d'agostu de 2009 espublizaba'l decretu 104/2009, del 29 de xunetu, "por el que se determinan los topónimos oficiales del concejo de Siero". Caltiénense como oficiales los nomes casteyanizaos de dalgunos llugares a la vera de los tradicionales.
Anguaño, Siero tien 29 parroquies.
| NOME | NOME OFICIAL | SUPERFICIE | POBLACIÓN |
| Aramil | Aramil | 1,83 | 349 |
| Argüeyes | Argüelles/Argüeyes | 6,28 | 443 |
| Carbayín | Santiago Arenas/Carbayín | 9,12 | 1.466 |
| La Carrera | La Carrera | 9,63 | 4.761 |
| Ceis | Celles/Ceis | 3,55 | 251 |
| La Collá | La Collá | 6,67 | 235 |
| Collao | Collao | 5,27 | 481 |
| El Cuto | El Cuto | 0,71 | 188 |
| Feleches | Feleches | 4,31 | 680 |
| Granda | Granda | 9,63 | 1.750 |
| Hevia | Hevia | 14,17 | 947 |
| Lieres | Lieres | 8,10 | 1.442 |
| Llimanes | Llimanes | 6,29 | 294 |
| Llugones | Lugones/Llugones | 5,48 | 12.727 |
| Marcenao | Marcenao | 3,65 | 172 |
| Muñó | Muñó | 10,04 | 353 |
| La Paranza | La Paranza | 1,31 | 6 |
| La Pola Siero | La Pola Siero | 3,75 | 12.363 |
| Samartindianes | Anes/Samartindianes | 27,18 | 1.175 |
| Samartino | Samartino | 14,82 | 1.005 |
| Samiguel | Samiguel | 5,06 | 261 |
| Santa Marina | Santa Marina | 5,97 | 177 |
| Santa Marta Carbayín | Santa Marta Carbayín | 4,65 | 969 |
| Santolaya de Vixil | Santolaya de Vixil | 4,27 | 178 |
| Tiñana | Tiñana | 6,89 | 982 |
| Trespando | Trespando | 4,10 | 221 |
| Valbona | Bobes/Valbona | 11,78 | 568 |
| Valdesoto | Valdesoto | 13,98 | 1.933 |
| Viella | Viella | 2,74 | 5.353 |
Noreña
Noreña ye'l conceyu más pequeñu n'estensión de too Asturies, con una superficie de 5,66 km², dixebrada en cinco enclaves dientro'l conceyu de Sieru, col que llinda por toles partes menos al Sur de la parroquia de Santa Marina, que toca con Llangréu.
Esta discontinuida xeográfica respuende a l'antigua división del Señoríu de Noreña, que taba formáu porla villa capital y los cuatro cotos de caza (La Felguera de Noreña, La Pasera, Serrapicón y Otero).
El topónimu del conceyu bien a depender, posiblemente y en teoría de Juan Uría Riu, del ríu del mesmu nome qu'atraviesa el tarrén. El primer documentu onde Gonzalo Peláez y Elvira Peláez, la so muyer, donen al monasteriu de San Vicente una heredá nomada baxo la fórmula "que vulgare vocatur Naurenia", pa camudalo Elvira cinco años más tarde n'otru diploma onde se fala de la "villa vocatur Norenia".
En 1369, el rei casteyanu Enrique II noma al so bastardu Alfonso Enríquez conde de los señoríos de Noreña y Xixón. L'actitú rebelde-y valdrá delles derrotes militares, destierros y la perda del títilu, pasando los territorios a l'alministración pol obispáu d'Uviéu hasta la desamortización de Mendizábal.
El territuriu del conceyu asitiase na llanera de Siero y tien como puntu de mayor altor el picu Santu Mederu, de 522 metros.
Cuenta con una población de 5.470 habitantes (2.666 homes y 2.804 muyeres) y una densidá de 1.034 hab/km².
La toponimia oficial del conceyu de Noreña recueye les formes tradicionales dende l'espublización nel BOPA númberu 48 del martes 27 de febreru de 2007 del decretu autonómicu 8/2007 del 31 de xineru d'esi mesmu añu. Les formes especifíquense nel ANEXU I al mesmu.
Tien trés parroquies:
| NOME | NOME OFICIAL | SUPERFICIE | POBLACIÓN |
| Ceis | Celles/Ceis | 1,56 | 74 |
| Noreña | Noreña | 3,84 | 5.387 |
| Santa Marina | Santa Marina | 0,26 | 9 |
No hay comentarios:
Publicar un comentario