Eilao

Mapa parroquial de Villayón

Eilao ye un conceyu del occidente asturianu, d'una superficie de 102 km² de territoriu pindiu y definíu pol riu Navia, y los sos afluyentes, que lu dixebra de Sur a Este. El mayor altor yel picu A Bovia, de 1.136 metros so'l nivel del mar. Llenda al Norte con Bual, al Este con Bual, Villayón y Ayande, al Sur con Pezós y Samartín d'Ozcos y al Oeste con Valanova d'Ozcos y Castropol.

Tien 465 habitantes (246 homes y 219 muyeres), con una densidá de población de 4,40 hab/km². El principal nucleu de población ye l'aldega de Zadamoño, na parroquia d'Eilao, colos sos 86 habitantes, mientres que la villa d'Eilao, capital del conceyu, tien 66.

Durante la Edá Media, el territoriu del actual Eilao dependerá del monasteriu de Vilanova d'Ozcos, pasando dempués a l'autoridá arzobispal d'Uviéu dientro'l gran conceyu de Castropol. Como otros conceyos d'alrodiu, la desamortización fecha por Felipe II da-y el chance d'independizase xurídicamente cola redención mercada polos vecinos. La posterior desamortización de Mendizábal va poner fin a los camudamientos de llendes.

La Xunta Asesora dela Toponimia inda nun inició'l procesu d'estudiu de los topónimos tradicionales del conceyu.

Eilao tien cinco parroquies:

Mapa parroquial del conceyu d'Eilao, dixebráu por colores

Bual

Mapa parroquial de Bual

Bual ye un conceyu de la fastera occidental asturiana, que s'estiende por 120,28 km² nun territoriu pindiu articuláu alrodiu del ríu Navia, que lu crucia pela parte oriental. El so mayor altor alcuéntrase nel monte A Bobia, de 1.162 metros. Llenda al Norte con El Franco y Cuaña, al Este con Villayón, al sur con Vilanova d'Ozcos y Eilao y al Oeste con Castropol.

Tien una población de 1.928 persones (957 homes y 971 muyeres) y una densidá de 15,49 hab/km². El principal noyu de población asítiase onde la villa de Bual, capital del conceyu, con 567 habitantes.

Mientres la Edá Media, formará parte del territoriu feudatariu del obispáu d'Uviéu y, dempues, del gran conceyu de Castropol, dientro del partíu de Riberas d'Armal (por alcontrase ellí la cárcel y la picota), xunto con Eilao. Dempués de la desamortización de Felipe II, les tierres del actual Bual fueron mercaes por Alonso de Camino, que dempues les vendería a Rui García de Cangas. Los vecinos conseguiríen redimise en 1580, ye dicir, pagaron una cantidá pa que fueren consideraes les sos tierres como de realengu, quedando independizáu como conceyu en 1584, estableciéndose les ordenances, escoyendo los cargos municipales y pasando les feligresíes a considerase como villes. La capitalidá pasaría por delles villes (Prelo, Armal, Castriyón y Bual, definitiva dende 1791). Serandinas intentó independizase de Bual en dos ocasiones, mientres 1814 y 1820.

La Xunta Asesora de la Toponimia yá inciara'l so trabayu d'estudiu de les formes tradicionales d'esti conceyu, pero tovía nun llegó a conclusión.

Bual tien siete parroquies:

Mapa parroquial del conceyu de Bual, dixebráu por colores

El Franco

Mapa parroquial d'El Franco

El Franco ye un conceyu de la fastera occidental d'Asturies, con un territoriu consistente nuna rasa costera dalgo más elevada que la de los conceyos vecinos y, al Sur, con pequeñes elevaciones como la de Penouta, de 899 metros. Con una estensión de 78,03 km², llenda al Norte col mar Cantábricu, al Este con Cuaña, al Sur con Bual y Castropol y al Oeste con Tapia.

Viven n'El Franco 4.046 persones (2.012 homes y 2.034 muyeres), polo que tien una densidá de 51 hab/km². A Caridá, villa y capital del conceyu, ye'l noyu de población más destacáu, colos sos 1.407 habitantes.

Esiste una bayurosa documentación pa la dómina medieval d'esti territoriu, que queda definíu en dellos documentos recoyíos nel Liber Testamentorum Ovetensis. Pasaría por delles manes, al ceder el rei esti territoriu de realengu a quien-y pruyera, cayendo finalmente nel dominiu del obispáu d'Uviéu, que lu incorpora al gran conceyu de Castropol en 1282. Pola mor de la desamortización de Felipe II, en 1579, esprópiense los bienes de la ilesia, y el territoriu d'El Franco, nomándose entós de Suero, ye vendíu a Álvaro Flórez de Quiñones en marzo de 1583. En setiembre d'esi mesmu añu, los vecinos merquen el territoriu pa pasar a constituise en conceyu, que s'integra na Xunta Xeneral de Principáu baxo la dependencia del conceyu Castropol. Les ordenances autoimpuestes contemplaben la reunión en conceyu abiertu d'ocho "cobres" o representantes de cada parroquia, organización que durará hasta 1826 (y de 1828 a 1836). En 1852 establézse A Caridá como capital del conceyu.

El Franco fue'l primer conceyu, xunto a Carreño y Llanes, n'algamar la oficiliadá pa los sos topónimos tradicionales, al traviés del Decretu 31/2005 del 21 d'abril, que fuera asoleyáu nel BOPA númberu 103 del vienres 6 de mayu. Les formes aprobaes pola Xunta Asesora de la Toponimia quedaron axuntaes al decretu nel ANEXU y correxíes nel BOPA númberu 294 del vienres 22 d'avientu de 2006.

Esti conceyu tien ocho parroquies:

Mapa parroquial del conceyu d'El Franco, dixebráu por colores.

Tapia

Mapa parroquial de Tapia

Tapia ye un conceyu occidental, con una superficie de 65,99 km² dixebrada ente les planicies costeres del Norte y les sierres suaves del Sur, onde s'alcuentra'l monte Pousadoiro de 643 metros, la elevación más granible. Llenda al Norte col mar Cantábricu, al Este con El Franco y al Sur y al Oeste con Castropol.

La población del conceyu sube hasta los 4.121 habitantes (1.990 homes y 2.131 muyeres) y la so densidá ye de 63,43 hab/km². Tapia, la villa capital, ye'l nucleu más pobláu con 2.329 habitantes.

Como los conceyos vecinos, el territoriu de Tapia cayerá na influyencia del gran conceyu episcopal de Castropol dende 1282. En 1300, los habitantes reclamen al obispu polos abusos alministrativos y algamen una meyora bultable nos tributos. Pero nun va ser hasta la desamortización de Felipe II, en 1579, cuando los vecinos merquen el territoriu y se organicen en conceyu, pero baxo la influyencia de Castropol hasta que Fernando Fernández de Casariego, en 1863, consiga la independencia total del mesmu.

Tapia ye un de los conceyos onde la Xunta Asesora de la Toponimia ta trabayando anguaño pa finalizar l'estudiu de los nomes de sitiu tradicionales.

Tien cuatro parroquies:

Mapa parroquial del conceyu de Tapia, dixebráu por colores

Castropol

Mapa parroquial de Castropol

Castropol ye un conceyu asturianu de la fastera occidental del territoriu, que llenda al Norte col mar Cantábricu, al Este con Tapia, El Franco y Bual, al Sur con A Veiga y Vilanova d'Ozcos y al Este cola ría del Eo. Tien una superficie de 125,77 km² de llombes costeres suaves que s'alcen al sur hasta los 1.202 metros del monte O Filso.

Viven ellí 3.807 persones (1.827 homes y 1.980 muyeres), con una densidá de población de 29,91 hab/km². El so noyu de másima población ye la villa de As Figuerias, con 588 habitantes, mientres que la villa de Castropol, capital del conceyu, llega a los 444.

Nel sieglu XIII, el rei Alfonso VII pon fin a la disputa ente los obispaos de Lugo y d'Uviéu pola propiedá de dellos territorios fronterizos, otorgando al lugués les tierres al Oeste del Eo y al asturianu les del Oeste, hasta'l Navia. En 1275, Alfonso X ufierta una carta puebla al obispáu, cola que funda la Pola de Rovoredo, col sofitu del conceyu de Ribadeo; por embargu, l'obispu d'Uviéu don Fernando, sintiendo les quexes de la nobleza autóctona, prefier abandonala y, en 1282, creyar una nueva, la Pola de Castropol, que tutelará l'alministración eclesiástica na zona ente l'Eo y el Navia, estableciendo xuntes d'alcaldes episcopales de dellos territorios dependientes nel nomáu campu de Tablado y con privilexu d'establecer un mercáu selmanal. El poder episcopal durará hasta la desamortización de Felipe II, en 1579, cuando'l pueblu se fai cola xurisdicción. Castropol caltendráse como cabezalera de la comarca hasta'l sieglu XIX, cuando Ribadeo y A Veiga algamen mayor importancia y, sobre too, pola dixebra de dellos territorios, que se constitúen en conceyos independientes.

La Xunta Asesora de la Toponimia yá inició l'estudiu de les formes toponímiques tradicionales del conceyu, pero tovía nun aprobó unes definitives qu'oficializar.

Castropol tien nueve parroquies:

Mapa parroquial del conceyu de Castropol, dixebráu por colores

A Veiga

Mapa paaroquial d'A Veiga

Esti conceyu asitiase na fastera más occidental del territoriu asturianu, con una superficie de 82,76 km² dixebrada ente les llanures aluviales de la vega del ríu Eo del Norte y les estribaciones de la sierra de La Bovia, al Sur, onde s'alcuentra'l so mayor altor, El Pozo da Neve, de 1.136 metros. Llenda al Norte y al Este con Castropol, al Sur con Vilanova d'Ozcos, Taramundi y Santiso d'Abres y al Oeste con Santiso otra vuelta y la ría del Eo.

Tien una población de 4.222 persones (2.060 homes y 2.162 muyeres), lo que fai una densidá de población de 51,82 hab/km². El mayor noyu de población ye la villa d'A Veiga, capital del conceyu, con 2.828 habitantes.

La so hestoria ta mui enllazada a la del conceyu de Castropol: dende 1298, momentu cuando l'obispu Fernando d'Uviéu funda la pola cola que se creya'l gran conceyu episcopal de Castropol, hasta 1836, cuando la comarca de la Vega de Ribadeo se constitúi como conceyu independiente con capital en Piantón. En 1851, el conceyu decide camudar la capital a l'actual, n'A Veiga.

Pol Decretu 61/2007 del 24 de mayu, asoleyáu nel BOPA númberu 144 del xueves 21 de xunetu, el conceyu tien como oficiales los nomes tradicionales eonaviegos de los sitios, que quedaron recoyíos nel ANEXU a la espublización oficial.

A Veiga tien seis parroquies:

Mapa parroquial del conceyu d'A Veiga, dixebráu por colores

Santiso d'Abres

Mapa parroquial de Santiso d'Abres

Esti ye'l conceyu más occidental de la xeografía asturiana, asitiándose nel cursu mediu del ríu Eo, que lu atraviesa d'Oeste a Este. La so superficie, de 31,41 km², ye de vegues, tando'l so mayor altor nel monte Xunqueira, de 664 metros. Llenda con Lugo por tolos puntos cardinales, menos pal Este, que lo fae colos conceyos d'A Veiga y Taramundi.

Viven nel conceyu 542 persones (259 homes y 283 muyeres), con una densidá de población de 19 hab/km². El principal nucleu de población ye la villa d'O Chao, capital del conceyu, con 146 habitantes.

El territoriu va ser oxetu d'una donación al obispáu d'Uviéu por parte del rei lleonés Alfonso VII nel añu 1137, incorporándose al conceyu episcopal de Castropol. Pero en 1172, el monasteriu de Meira faise cola metá del territoriu. Em 1537, don Lope Moscoso, conde d'Altamira, compra la parte uvieína. En 1579 prodúzse la desamortización de los bienes de la Ilesia de Felipe II y los territorios monacales pónense a la venta, siendo mercaos pol pueblu que xunta'l territoriu pa exercer la xurisdicción como un conceyu, nomando xueces y rexidores; por embargu, el poder del monasteriu de Meira y de los condes d'Altamira caltendránse, al tener que compartir la xurisdicción con ellos y pagar diezmos y impuestos. Nun va ser hasta les reformes lliberales de la década de los 30 del sieglu XIX cuando los privilexos del cleru y la nobleza desapaezcan, pa constituyise un conceyu popular.

La Xunta Asesora de Toponimia del Principáu d'Asturies tovía nun inició el procesu d'estudiu de les formes tradicionales propies al conceyu.

Santiso d'Abres tien una sola parroquia:

NOME	SUPERFICIE	POBLACIÓN
Santiso	31,41	542

Mapa parroquial del conceyu de Santiso d'Abres, dixebráu por colores