Castrillón ye un conceyu asitiáu na rasa central del llitoral asturianu, a la marxe izquierda la ría d'Avilés. Llenda al Norte col mar Cantábricua, al Este con Corvera y Avilés, al Sur con Illas y Candamu y al Oeste con Sotu'l Barcu.
Ye un territoriu llanu pa la costa, onde presenta una sucesión de playes y cantiles, con suaves llombes pal interior, p'algamar una altura de 438 metros nel Práu del Marqués, que s'estiende por una superficie de 55, 34 km².
La so prosimidá al conceyu d'Avilés fizo que aumentara la so población dende la segunda metá'l sieglu XX, algamando anguaño'l sétimu puestu de conceyos más habitaos con un padrón de 22.832 persones (11.150 homes y 11.682 muyeres). La densidá de población asciende a 411,49 hab/km². La villa de Piedrasblancas (parroquia de Samartín de l'Aspra), capital del conceyu, colos sos 9.596 habitantes ye'l núcleu mas pobláu del conceyu, siguía pola tamién villa de Salinas (en Salinas), con 4.453 y el llugar de Raíces Nuevo, entidá singular de población nun dependiente de parroquia denguna, con 2.398 habitantes.
Castrillón ye conceyu independiente dende 1816, gracies al triunfu de les idegues lliberales que sofitaben l'acercamientu del pueblu a la so gobernabilidá y que procuraron la independencia pa col conceyu d'Avilés, del que dependíen los territorios castrillonenes dende que'l rei Fernando IV-y otorgara'l fueru a la villa d'Avilés, colos mesmos llindes que l'anterior Alfoz de Gauzón.
El nome del conceyu quiciás venga del castiellu de Gauzón que foi construyíu sobre'l sieglu IX nel peñón de Raíces, pa defender la bocana de la ría d'Avilés. Asina, Xosé Lluis García Arias diz en Pueblos asturianos: el porqué de sus nombres: "Castrillón es un derivado del lat. CASTRUM ‘lugar fortificado’ pero combinado con un diminutivo -iellu que, a su vez, recibe una incrementación aumentativa en –ón".
La toponimia tradicional ye la oficial pal conceyu dende'l Decretu 57/2008 de 26 de xunu, espublizáu nel BOPA númberu 159 del miércoles 9 de xunetu d'esi mesmu añu. Los topónimos oficiales (dalgunos, billíngües) quedaron recoyíos nel ANEXU 1 del decretu y nes rectificaciones posteriores, espublizaes nel BOPA númberu 177 del miércoles 30 de xunetu.
Les entidaes singulares de porblación castrillonenses.
Dientro la xeografía del conceyu Castrillón alcontramos siete núcleos de población que nun pertenecen a denguna parroquia: El Coto Carcéu, Raíces Nuevo / La fundición, San Cristoba y San Xuan dientro de la parroquia de Salinas; Miranda y La Cruz d'Illes, dientro de Samiguel de Quiloñu; y La Llaguna, dientro Piarnu.
La situación d'estos núcleos dientro del nomenclátor d'entidades de población ye única dientro d'Asturies porque, si bien la población dispersa propia del país fai que'l mapa'l mesmu se vea salpicáu de villes, aldees, llugares, caseríos o poblaos, estos caltiénense dientro d'una o más parroquies (por exemplu, alcontramos el casu del llugar de Cualloto dixebráu ente les parroquies de Granda de Siero y la urbana d'Uviéu), pero nunca nun d'una forma independiente.
Albidramos que les desplicaciones factibles a la esistencia d'esta "anomalía" puen ser dos:
Por un lláu, la dixebra d'una parroquia única preesistente enantes de l'actual repartición de los conceyos, que dexare determinaos llugares o aldees aislaos de la so parroquia: asina desplicaríense los casos de San Xuan, al otru lláu de la desembocadura de la ría onde s'alcuentra la parroquia avilesina de San Xuan de Nieva (precisamente'l nome casteyanu que se-y da a la población castrillonense); el de San Cristoba, que perteneciera a la parroquia avilesina del mesmu nome, al igual que El Cotu Carcéu y los cuatro barrios de Raíces Nuevo; y Miranda, que ta nel mesmu casu que San Cristoba con respeutu a la parroquia de Miranda n'Avilés y de los llugares de La Cruz d'Illas y La Llaguna, que pertenecieren antaño a esa parroquia avilesina.
Y por otru, la dixebra direuta d'un llugar ente dos conceyos diferentes: ye'l casu de La Cruz d'Illes, que tien buena parte del so territoriu dientro la parroquia avilesina de Miranda. Esta ye la desplicación pola qu'en delles descripciones La Cruz d'Illes castrillonense bien somorguiada al núcleu de Miranda, cuando son independientes dafechu.
Castrillón tien ocho parroquies rurales y siete entidaes singulares de población:
| PARROQUIES | ||
| NOME | SUPERFICIE | POBLACIÓN |
| Bayas | 6,25 | 99 |
| Naveces | 4,96 | 534 |
| Piarnu | 16,46 | 800 |
| El Puertu | 2,38 | 479 |
| Salinas | 3,77 | 4.453 |
| Samartín de l'Aspra | 4,36 | 11.616 |
| Samiguel de Quiloñu | 11,70 | 928 |
| Santiagu'l Monte | 5,46 | 290 |
| ENTIDAES SINGULARES DE POBLACIÓN | ||
| NOME | CATEGORÍA | POBLACIÓN |
| El Cotu Carcéu | Llugar | 820 |
| La Cruz d'Illes | Llugar | 85 |
| La Llaguna | Llugar | 39 |
| Miranda | Llugar | 90 |
| Raíces Nuevo / La Fundición | Llugar | 2.398 |
| San Cristoba | Aldea | 55 |
| San Xuan | Llugar | 123 |
Mapa parroquial del conceyu de Castrillón, dixebráu en colores
