29 sept 2011

Cabranes

Cabranes ye un conceyu rodiáu pol de Villaviciosa, al Norte, Piloña, al Este y Sureste, y Nava, al Oeste y Suroeste. Pesie a que nun tien grandes altures, siendo la cota mayor el monte Incós (581 metros), ye una sucesión de valles propicies pa les pequeñes esplotaciones ganaderes, la industria forestal y el cultivu de mazana, alcontrándose'l conceyu nel mediu la Comarca de la Sidra.

La hestoria d'esti municipiu tien una anicios escuros, porque nun esisten fuentes escrites de la so fundación. Va ser pal sieglu XIII cuando'l conceyu apezca afitáu, ensin les llendes d'anguaño, ente los monasterios vecinos, principalmente'l de Valdediós. A medida qu'avanza la Edá Media, la infuyencia de la nobleza asturiana y llocal, va dir faciéndose mayor, pero siempres tapecida pol influxu monásticu. Nun va ser hasta'l sieglu XVI, con Felipe II de rei, onde'l conceyu va ser dafechamente independiente. Nel sieglu XIX, cuando'l monasteriu de San Vicente pierde'l cotu de Camás, esti pasa a l'autoridá conceyil cabraniega, zarrando los camudamientos del territoriu oficial hasta'l día de güei.

N'esti territoriu asitiense anguaño 1.080 persones (556 homes y 524 muyeres), lo que fai una densidá de población de 28,19 hab/km². El núcleu de población más grande ye la villa de Santolaya, capital del conceyu, con 159 habitantes.

Pola mor del Decretu 118/2005, espublizáu nel BOPA númeru 279 del vienres 2 d'avientu d'esi mesmu añu, la toponimia tradicional asturiana ye la oficial nel conceyu, coles formes estipulaes nel ANEXU 1. (Solo pal llugar de Ñao, en la parroquia de Viñón, se caltién amás la fórmula anterior Niao)

Cabranes tien seis parroquies:

NOMES

SUPERFICIE

POBLACIÓN

Fresnéu

11,09

279

Graméu

1,61

37

Pandenes

5,14

78

Santolaya

5,85

317

Torazu

8,36

253

Viñón

6,26

116

Mapa parroquial del conceyu Cabranes, dixebráu en colores.

27 sept 2011

Caravia

Caravia ye'l tercer conceyu más pequeñu d'Asturies, con 13'36 km², y ta asitiáu a la vera'l mar Cantábricu y ente los conceyos de Ribeseya, al Este, y Colunga, al Oeste. Tien bayurosos valles que descienden del cordal del Sueve (onde atopamos l'altu d'El Fitu, con 631 metros) p'hacia los tres sableros de La Beciella, L'Arenal de Morís y La Espasa.

La primer referencia documental del topónimu'l conceyu, apaez nunes donaciones del rei Ordoño II a la catedral uvieína nel primer cuatru'l sieglu X, embaxo la forma "Karauiam". Como territoriu, siempres tuviera vinculáu al vecín de Colunga, anque col diferenciador monasteriu de Santigo de Caravia, fundáu nel sieglu XI pol conde Munia Roderici; el monasteriu, que pasare a manes episcopales en 1176 por donación del rei Fernando II, quedará esentu cincuanta años dempués pola mediación del rei Alfonso IX, pasando Caravia a ser territoriu d'abadengu. Por embargo, nes Ordenances de 1494 de la Xunta Xeneral, formando parte del partíu de Llanes y nel asientu 33, apaez un representante del conceyu de realengu de Caravia; nun se sabe cómo se dixebró del Obispáu, pero sí que delles families del territoriu foron algamando'l poder. Tal independencia solamente se viera amenaza en 1839, cuando la Diputación Provincial de Oviedo intentó incorporarlu al de Colunga, pero los vecinos opunsiéronse y redautaron una carta coles sos motivaciones qu'unviaron a la reina Isabel II, qu'intercedió por ellos.

Caravia tamién ye ún de los conceos menos habitaos, con 533 almes (270 homes y 263 muyeres) y una densidá de población de 39,9 hab/km². El llugar de Prau, la capital, en Caravia l'Alta, ye'l núcleu más pobláu con 197 habitantes.

El procesu d'oficialización de la toponimia tradicional ta en fase de tramitación. Pa faer los mapes garré los nomes apurríos pol ALLA, y usaos tanto po la SADEI (que, por cierto, onde la so páxina dixital, tien mal los enllaces de les parroquies caravienses pa cola so información interparroquial, apurriendo los datos de les parroquies ayandeses de Bisuyu y Berducedo) como pola Uiquipedia.

Caravia tien dos parroquies:

NOMES

SUPERFICIE

POBLACIÓN

Caravia

5,31

235

Caravia l'Alta

8,05

298

Mapa parroquial del conceyu de Caravia, dixebráu en colores.Enlace

26 sept 2011

Colunga


Pesie a los asentamientos castreños y romanos nel conceyu, les primeres evidencies documentales onde apaez el topónimu "Colunga" nun se dan hasta la dómina del rei Bermudo II, cuando representantes del alfoz, incluyíu dientro'l territoriu Caravia, intervienen nun conciliu cellebráu n'Uviéu nel 1115. Nel sieglu XIII apaez la Pola de Colunga al traviés d'una carta puela, pa organizar el territoriu del alfoz; ensin embargu, la puxanza d'otros núcleos del conceyu, como La Isla y Llastres, y d'otres poles vecines, como Maliayo y Ribeseya, faen que'l proyeutu seya desaniciáu, volviendo a ser tierres de realengu. Nun sedrá hasta'l sieglu XVI cuando se constituya de fechu'l conceyu.

Colunga ye un conceyu costeru con un relieve estremáu, dende una rasa costera d'escasu altor al Norte, hasta les primeres cotes de la sierra'l Sueve al Suroeste, onde s'atopa'l Picu Pienzu y los sos 1.159 metros so'l nivel del mar. Tien una estensión de 97,57 km² y llinda al Norte col mar Cantábricu, al Este con Caravia, al Sur con Piloña y Parres y al Oeste con Villaviciosa.

Anguaño presenta una población de 3.778 habitantes (1.855 homes y 1.923 muyeres), con una densidá de 38,72 hab/km². La villa de Colunga, capital del conceyu, ye'l núcleu más pobláu, con 1.132 habitantes.

La toponimia oficial del conceyu de Colunga ye la tradicional asturiana dende que s'aporbare'l Decretu 129/2006 del 21 d'avientu d'esi añu, espublizáu nel númberu 5 del BOPA del llunes 8 de xineru de 2007 y les sos formes quedaron establecíes nel ANEXU 1 al mesmu.

Colunga tien trece parroquies:

NOMES

SUPERFICIE

POBLACIÓN

Carrandi

10,15

98

Colunga

3,22

1.132

Gobiendes

17,71

301

La Isla

3,83

198

Llastres

13,49

1.024

La Llera

1,51

6

Lliberdón

16,20

220

Llue

6,64

179

Pernús

5,32

97

Pivierda

5,83

85

La Riera

7,94

144

Sales

1,91

132

San Xuan de la Duz

3,82

162

Por último, esclariar que'l mapa apurríu pola publicación cabecera d'esti trabayu, División parroquial de Asturias, Uviéu 1993, ufre dos parroquies dixebraes pal actual tárren de Llastres: por un lláu, Lluces, con un territoriu de 10 km²; pol otru, Llastres, con 3,1 km². Nun atopé'l momentu cuando se produz la xunión (los datos qu'ufierta la SADEI na so páxina dixital lleguen al 2001).

Mapa parroquial del conceyu Colunga, dixabráu en colores.

25 sept 2011

Gozón


Gonzón ye'l conceyu más septentrional del territoriu asturiano, asitiándose a dambes fasteres del cabu Peñes. Tien una superficie de 81,73 km² de relieve nidiu (tando'l cumal nos 138 metros de Tablaes, parroquia de Santiao d'Ambiedes), con cantiles d'altor granible y un nnúmberu bayorusu de sableres na costa. Llinda al Norte col mar Cantábricu, al Este con Carreño, al Sur con Corvera y al Oeste con Avilés.

Alfonso X concede la carta puela a la Pola de Gozón nel sieglu XIII, pa organizar un territoriu de realengu que yá esistía dende'l sieglu XI al rodiu de la villa pesquera y ballenera de Lluanco, que fadrá de capital d'un tarrén básicamente agrariu. Por embargu, Fernando IV, pal sieglu XIV, fai depender Gozón d'Avilés, anque calteniendo la presencia de representantes gozoniegos na Xunta Xeneral del Principáu. En 1605, Gozón algama definitivamente la independencia como conceyu.

La población actual ye de 10.788 habitantes (5.272 homes y 5.516 muyeres), lo que fai una densidá de población de 132,01 hab/km². La villa de Lluanco, capital del conceyu, con 5.423 habitantes, ye'l núcleu más pobláu de Gozón.

Los topónimos tradicionales son oficiales pal conceyu de Gozón (anque se caltién la fora doble Luanco/Lluanco pa la capital) dende la espublización del Decretu 72/2005 de 7 de xunetu d'esi añu, nel númberu 171 del 25 de xunetu de 2005 del BOPA y queden recoyíes nel ANEXU I al mesmu (coles rectificaciones necesaries espublizaes nel númberu 191 del 18 d'agostu).

Gozón tien 13 parroquies:

NOMES

SUPERFICIE

POBLACIÓN

Bañugues

2,60

631

Bocines

10,71

510

Cardo

10,39

484

Eres

4,16

231

Llaviana

4,47

505

Lluanco

3,84

5.963

Mazaneda

3,64

166

Samartin de Podes

7,18

372

Santiao d'Ambiedes

13,43

661

Santolaya

6,86

563

Verdicio

5,93

279

Viodo

5,61

246

Vioño

2,91

177


Mapa parroquial del conceyu de Gozón, dixebráu en colores.Enlace

22 sept 2011

Carreño

Carreño ye un conceyu independiente dende'l sieglu XVII, cuando se dixebró definitivamente del alfoz d'Avilés. Anantes, el territoriu foi incluyíu nes tierres de Gauzón y, nun curtiu espaciu tiempu del sieglu XIII, caltuvo vixencia una carta puebla que-y diera autonomía, hasta que'l soberanu Fernando VII lu integrara n'Avilés otra vuelta. Sicasí, siempre tuvo Carreño estatus de realengu y representantes na Xunta del Principáu, anque dependientes d'Avilés.

Carreño tien una superficie de 66,70 km² y llinda con Xixón al Este y al Sur, Corvera al Sueroeste, Gozón al Noroeste y el mar Cantábricu al Norte. El conceyu nun algama cotes de gran altitú, siendo'l puntu más altu'l Monte Areo con 264 metros sobre'l nivel del mar, pero les llombes que lu crucien d'Este a Oeste dixébrenlu en cinco valles.

Anguaño, la población del conceyu ye de 11.000 habitantes (5.370 homes y 5.630 muyeres), con una densidá de 163,96 hab/km². El núcleu de población más bultable ye la villa de Candás, capital del conceyu, con 6.982 habitantes.

Carreño fue'l primer conceyu n'oficializar los sos topónimos tradicionales al traviés del Decretu 30/2005 del 21 d'abril, espublizáu nel BOPA númberu 106 del 6 de mayu de 2005.

Carreño tien 12 parroquies:

NOMES

SUPERFICIE

POBLACIÓN

Albandi

1,82

622

Ambás

3,23

218

Candás

2,21

7.437

Carrió

2,31

152

Llorgozana

11,28

375

Perlora

10,96

750

El Pieloro

5,83

211

Prevera

5,74

190

Priendes

2,31

109

Quimarán

5,03

349

Tamón

8,95

334

El Valle

7,03

253

Mapa parroquial de Carreño, dixebráu en colores.

19 sept 2011

Llanera

El nome del conceyu fala nidio de les sos carauterístiques físiques: los sos 106,69 km² asitiense nos llanos pal Norte del ríu Nora, siguiendo p'hacia l'Oeste la nomada "llanera de Siero". La so elevación más importante ye'l picu Gorfolí, de 617 metros.

Lo afayaízo del tarrén fizo que yá los romanos s'aposentare elli, na mansio (una parada oficial de les calzaes romanes, sofitaes pol Imperiu) de "Lucus Asturum", l'actual Llugo.

La documentación medieval de trespase de propiedaes ye bayurosa pa esti conceyu, destacando les donaciones de los monarcas asturianos a diferentes monasterios; anque, sobre toos, a la Ilesia mayor d'Uviéu, que fadrá del obispu el mayor terrateniente de la zona. Poro, mientres los sieglos XIV y XV, l'alministración de Llanera dependiera del Obispáu uvieín, asociándola a la de Les Regueres, mediante la figura del encomenderu (escoyíu d'ente una de les families nobles del llugar). Les tensiones ente paisanos y encomenderos fueron abondes, hasta'l puntu de qu'una rebelión de principios del XV acabaría cola escomunión de tola población por decisión del obispu don Guillén: ye lo que se conoz col nome de "los esconxuraos". Col reináu de Felipe II, nel sieglu XVI, Llanera pasa a ser concyu de realengu, pero'l conceyu d'Uviéu merca'l tarrén ensin consentimientu vecinal. Poro, los enfrentamientos volverán apaecer, hasta que ná dómina del XIX, el conceyu algama la independencia y l'asientu númberu 39 na Xunta Xeneral.

El conceyu llinda con Corvera al Norte, con Xixón y Siero al Este, con Uviéu al Sur y con Les Regueres y Illas al Oeste.

Anguaño viven en Llanera 13.919 persones (6.884 homes y 7.035 muyeres), con una densidá de población de 130,46 hab/km². La estación de Llugo, con 3.410, ye'l núcleu más habitáu, siguíu de cerca pol llugar de Posada, parroquia de Rondiella, que ye la capital del conceyu, con 3.243.

El conceyu llaneranu índa nun oficializó la so toponimia tradicional, alcontrándose col procesu abiertu a fecha de güei. Pa faer los mapes, uso los nomes apurríos como tradicionales pel SADEI na so páxina, que coinciden colos d'otres espublizaciones, como ye la entrada "Llanera" na Uiquipedia. Espublizaos dambos na mío páxina de Facebook, nun recibieron comentariu dengún pa correxilos, polo que los doi por buenos.

Llanera tien once parroquies.

NOMES

POBLACIÓN

SUPERFICIE

Ables

354

3,01

Arlós

392

11,58

Bonielles

185

5,79

Cayés

502

6,01

Ferroñes

198

9,35

Llugo

4.676

16,48

Pruvia

2.553

10,14

Rondiella

3.427

5,90

San Cucao

696

13,02

Santa Cruz

270

12,71

Villardebeyo

666

12,70

Mapa parroquial del conceyu Llanera, dixebráu en colores.